Usansoloko Bridgestoneko langileek greba egin dute gaur, Basauriko lankideei babesa adierazteko

TESTUA: Jon Gomez Garai
ARGAZKIA: EFE Agentzia

Basauriko Bridgestone lantegian 335 langile kaleratzea aurreikusten du zuzendaritza nagusiak, eta horren aurrean greba deialdiak egiten ari dira. Gaurko deialdira, gainera, Usansoloko fabrikako langileak ere gehitu zaizkie.

Bridgestone pneumatikoen enpresako zuzendaritza nagusiak 335 kaleratze iragarri zituen apirila hasieran, eta hilaren 8tik greba egunak egiten ari dira, sindikatuen arabera, %100eko jarraipenarekin eta ekoizpena erabat geratzeko gaitasunarekin.

Hilaren 15arekin, martitzena, hirugarren eguneko greba egin dute Basauriko lantegiko langileek. Baina aurrekoetan baino indar handiagoa erakutsi dute, Bridgestonek Usansolon daukan lantegiko langileek ere greba egin baitute gaur. Usansoloko lantegian zuzendaritzak ez du kaleratzerik aurreikusi, baina bertako langileek greba ere egin dute, «Basauriko lankideei babesa adierazteko», adierazi du langileen batzordeak.

Aste Santuko oporretatik bueltan, beste hiru greba egun iragarri dituzte langileek apirilaren 24, 25 eta 26rako.