Inauterietako jaia antolatu du Zizpak otsailaren 18rako
TESTUA: Irati Alonso García
ARGAZKIAK: Zizpa Gazte Konpartsa
Otsailarekin batera mozorroak ateratzeko ordua helduko da eta urtero moduan Zizpa Gazte Konpartsak jai berezia egingo du Galdakaon inauteriak ospatzeko. Hilaren 18an izango da udaletxeko karpan eta playback txapelketa, afaria eta mikro irekia antolatu dituzte, besteak beste.
Kolore eta jai giroa helduko dira Galdakaoko txokoetara otsailaren hirugarren asteburuan. Zizpa Gazte Konpartsak inauteriak ospatzeko ekitaldi berezia antolatu du aurten ere, kasu honetan otsailaren 18an. Mozorroak erakusteko, afaltzeko eta musikaz gozatzeko tartea izango da udaletxeko plazan.
Arratsaldeko 17:00etan hasiko da jaia, gazte eta helduen playback txapelketarekin. Izena momentuan eman daiteke eta aurretik egiteko aukera dago ere, zizpagaztekonpartsa@gmail.com helbidera idatziz. Musika pendrive batean eraman behar dela gogorarazi du Zizpak.
Iluntzean aldiz Ball de Diables de Tarragona ikusteko aukera izango dute herritarrek, 20:00etan. Hau amaitzean afaltzeko ordua helduko da, tiketak jada salgai daudela 12 euroko prezioan Herriko Bentan, Zurruten eta Oñarten.
Azkenik, mikro irekia antolatu dute beste urte batez 22:00etan. Honetan parte hartzeko aurretik izena ematea beharrezkoa da, Zizparen Instagram kontura edo 654953146 zenbakira idatziz. Partaideen izenak eta ikuskizuna egiteko beharrizanak aipatu behar dira mezuan.
Mikro irekirako materiala Zizpa talde berak jarriko du eta musika-tresna hauek eramango ditu: lau mikro, pianoa, gitarra, kutxa, trikia, panderoa eta ukelelea. Ikuskizun motari dagokionez, «librea» izango dela azaldu dute antolatzaileek, hori bai, «ez ditugu erakustaldi arrazista, homofobo edo matxistak onartuko». Euskaraz eskaintzen diren erakustaldiak lehenetsiko dituzte eta talde bakoitzak lau minutu izango ditu gehienez ikuskizuna egiteko.
Aurtengo mozorroen gaia monokromatikoa da eta gau osoan zehar izango da hauek photocall-ean erakusteko aukera. Urtero bezala, sariak banatuko dituzte onenen artean. Pasa den otsailean Boliñak eta Atzekoz Aurrera kuadrilek irabazi zuten mozorro lehiaketa, Binkek jaso zuen moduan.
