Txabola batek su hartu du gaur arrastian Galdakaoko Bengoetxe auzoan

TESTUA: Jon Gomez Garai
ARGAZKIA: Galdakaoko Udaltzaingoa

Sare sozialen bidez zabaldu da notizia, Bengoetxe parean txabola batek su hartu duela eta barruan norbait egon zitekela ohartaraziz. Galdakaoko Udaltzaingoarekin berba egin du Binkek, eta poliziak hedabide honi adierazi ez dela zauriturik egon.

Arratsaldeko 15:15 aldera auzokide batek Galdakaoko Udaltzaingora deitu du, gaur eguena 29, Bengoetxe auzoan dagoen txabola batek su hartu duela ohartarazteko. Berehala gerturatu dira udaltzainak, suhiltzaileak eta ertzainak ezbeharraren tokira. Ingurua babestu ostean sua itzali dute Bizkaiko suhiltzaileek.

Bengoetxe auzotik Ergoienera bidean egon da kokatuta txabola, AP-8 autobidearen parean, eta sare sozialen bidez barruan norbait egon zitekeela zabaldu bada ere, Udaltzaingoak Binkeri adierazi dio ez dela inolako zauriturik egon.

Gertatutakoa ikertzen ari da polizia, oraindik ez baitakite sutea zergatik gertatu den.