Galdakaoko Udalak industria enpresei euren marketin estrategia indartzen laguntzeko prestakuntza antolatu du azaroaren 17rako, Gumuzio Garapen Zentroan. ‘Birdiseinatu zure marketin estrategia: intuiziotik ekintza planera’ izenburupean, saioa 09:00etatik aurrera eskainiko da.
Etengabe aldatzen ari diren merkatuetan lehiakorrak izaten jarraitzeko, enpresek euren estrategiak egoera berrietara egokitu behar dituzte. Marketinak funtsezko eginkizuna du testuinguru horretan, enpresen balioa nabarmentzeko, bezeroengana iristeko eta negozio aukerak sortzeko ezinbesteko tresna baita.
Horregatik, Galdakaoko Udalak industria enpresei beren marketin estrategia indartzen laguntzeko prestakuntza antolatu du azaroaren 17rako, Gumuzio Garapen Zentroan. ‘Birdiseinatu zure marketin estrategia: intuiziotik ekintza planera’ izenburupean, saioa 09:00etatik 12:00etara egingo da.
Enpresek beren egungo egoera aztertzeko, hobetu beharreko alderdiak identifikatzeko eta eguneroko jardunean aplikatzeko moduko ekintza plan argia diseinatzeko baliabide praktikoak eskaintzea da helburua.
Horretarako, jardunaldian hainbat alderdi landuko dira, hala nola, egungo marketin estrategiaren diagnostikoa nola egin, lehentasunezko kanalak aukeratzeko zer irizpide erabili eta bezeroekin zein hornitzaileekin konektatzeko mezu eraginkorrak nola sortu. Horrez gain, SMART irizpideetan oinarritutako adierazleak definituko dira, helburuen betetze maila neurtzeko, eta merkataritza emaitzak hobetzeko ekintza zehatzak ere zehaztuko dira.
Jardunaldiak solasaldi irekia eta networking egiteko tartea ere izango ditu, bertaratutakoek beren esperientziak trukatzeko, harreman profesional berriak sortzeko eta elkarlanerako aukera izan dezaten.
Horrelako ekimenen bidez, Gumuzio Garapen Zentroak enpresen garapena eta industria sarearen lehiakortasuna sustatzeko egiten duen lana indartzen du, ezagutza praktikoa eskuratzeko eta enpresen arteko lankidetzaaukerak bultzatzeko espazioak eskainiz.
