Gazteak eta euskara, ariketa soziala
BINKE / 2020ko azaroa

Egunotan martxan dabilen Gaztealdiaren sustatzaile da Galdakao ere

TESTUA: Iñigo Larrea Labarrieta
ARGAZKIA: Jon Gomez Garai

Euskaraldiaren aurreko astean, Euskal Herriko hainbat gazte elkartek ariketa sozial bat martxan jarri dute gazteon kontzientziak pizteko eta hizkuntza-ohituren inguruko hausnarketa egiteko asmoz. Ekimena aurrera eramaten Galdakaoko Bagabiz euskara elkarteko gazteak ditugu.

Belaunaldi berriek geroz eta euskara gutxiago darabilte, Gaztealdia ekimena sortu dutenen arabera. Gainera, gazteek duten euskararen ezagutzak gora egin du, baina erabileran ez da aldaketa nabarmenik egon. Egoera horrelakoa izanik, Euskal Herriko hainbat eragileen artean proiektu berri bat martxan jartzea erabaki zuten. Proiektu horren izena Gaztealdia da, eta horren bitartez, gazteek euskararekiko dituzten ideiak, harremanak, bizipenak… aztertuko dira. Horretarako, Euskal Herriko adin, kokapen geografiko eta errealitate soziolinguistiko ezberdinetako 9 gazte hautatu zituzten, betiere aurki daitezkeen testuinguru anitz eta errealistenak bilatuz. Gazte horiek zortzi egunetan zehar —azaroaren 12tik 19ra— euskara hutsean aritzeko konpromisua hartu zuten, eta behin ariketa hori eginda, Gaztealdikoek abiapuntu sendo batetik jo ahal izango dute hausnarketa sakon eta eraikitzailea egiteko.

Galdakaoko Bagabiz euskara elkarteko gazteek 22 urteko irakasle sodupear bat aukeratu zuten: Amaia Larruzea. Galdakoztarren hautaketa ez zen zorizkoa izan; izan ere, testuinguru berezia zuen euskaltzale baten bila egon ziren, eta Larruzea hautagairik aproposena zela ondorioztatu zuten. Larruzea AEKko irakaslea da, eta bere udalerrian euskaraz hitz egiteko hainbat zailtasun aurkitu izan ditu. Lanean eta lagunekin bakarrik erabiltzen du euskara, egunerokotasunean euskaraz aritzea ezinezko egiten baitzitzaion. Gaztealdiaren bitartez, Larruzeak eta Euskal Herri mailan aukeratutako beste gazteek aurkitu izan dituzten oztopoak zehaztu eta aztertuko dituzte, ekimenaren helburu nagusia euskararen erabilera determinatzen duten baloreak identifikatzea baita.

Era berean, bi helburu nagusitan banandu izan da ekimena: lehenengoa, gazteek haien bizitza proiektua euskaraz bideratzeko aurki ditzaketen zailtasunak identifikatzea. Bada, ekimenean lanean aritu diren elkarteen ustez, ez dago faktore oztopatzaile bakarra, eta horregatik oso garrantzitsua da faktore guztiak ondo identifikatzea. Bigarren helburua, herri-proiektuan euskarak duen betebeharraz hausnartzea izango litzateke; hau da, gazteek euskararen egoeraz hausnartzea, eta posible baldin bada euskararekiko jarrera baikorra aktibatzea. Aipatutakoaz aparte,Gaztealdia azaroaren 20tik abenduaren 4ra bitartean ospatuko den Euskaraldiaz baliatuko da, bi ekimenek antzeko helburuak lortu nahi baitituzte. Gaztealdiko gazteek aldarrikatzen dute Euskaraldia bezalako herri ekimenetan haien parte hartzea kuantitatiboa izateaz gain, kualitatiboa ere izatea nahi dutela, ahots propioarekin hitz egin nahi baitute. Hori dela eta, ekimenean parte hartuko dutenek azpimarratzen dute Euskaraldiaren testuinguruaz baliatuko direla sortuko den aktibazio soziala gazte euskaldunei ere hel dakien.