Sagardotegira irteera antolatuko du Zizpak martxoaren 16an
TESTUA: Irati Alonso García
ARGAZKIA: Arratzain sagardotegia
Azken urteetan bezala, Zizpa Gazte Konpartsak sagardotegira irteera antolatuko du, kasu honetan martxoaren 16an. Usurbilgo Arratzain sagardotegira joatea proposatu du taldeak eta tiketak bihar, otsailak 20, eta etzi izango dira salgai 55 euroko prezioan.
Zizpa Gazte Konpartsa galdakoztarrak hainbat ekintza antolatu ohi ditu urtean zehar gazteen arteko elkarbizitza sustatzeko helburu. Azken urteetan bezala, oraingoan ere sagardotegira irteera proposatu dute, kasu honetan martxoaren 16an.
Usurbilgo Arratzain sagardotegira joateko aukera eskainiko dute aurten. Horretarako, autobusak jarriko dituzte Galdakaotik. Zehazki, goizeko 10:30ean irtengo dira eta buelta 03:30etan izango da Hernanitik, bazkalostean hor jarraituko baitute parranda.
Zizpak jakinarazi duenez, tiketak bihar eta etzi izango dira salgai Herriko Bentan ordutegi hauetan:
- Bihar, otsailak 20: 17:00-19:00
- Etzi, otsailak 21: 20:00-21:00
