Telebista
BINKE / 2022ko apirila

Ainhoa Cantalapiedrak Telecincoren Supervivientes reality-an hartuko du parte

TESTUA: Erredakzioa
ARGAZKIA: David de Haro

Operación Triunfo Espainiako telebistako lehiaketa 2002an irabazi zuen abeslari galdakoztarra, Ainhoa Cantalapiedra, Telecinco kateko Supervivientes saioan arituko da lehiakide. Baina, zer dakigu azken boladan bere inguruan?

Ainhoa Cantalapiedra abeslari galdakoztarrak Espainiako Supervivientes saioan parte hartuko duela konfirmatu zuen domekan, apirilak 3, Telecinco telebista-kateak. Honduraseko irla batean hainbat famaturen elkarbizitzatik ateratako irudiekin, probekin eta elkarrizketekin osatutako telebista-saioa da Supervivientes, reality edo lehiaketa formatukoa.

Supervivientes saioaren denboraldi berria laster hasiko da, eta denboraldi berriko hirugarren lehiakidea nor izango den iragan domekan eman zuen jakitera Telecinco telebista-kate espainiarrak: Ainhoa Cantalapiedra, Operación Triunfo kantarien lehiaketaren bigarren edizioko irabazle izan zena.

Iragarri zuten lehenengo lehiakidea Nacho Palau izango da, Miguel Bosé kantariaren bikote 26 urtetan izandakoa, bigarrena Kiko Matamoros prentsa arroseko kolaboratzailea eta hirugarrena, eta momentuz iragarritako azkena, 1980an Galdakaon jaiotako abeslaria izango da. Berria jakitera eman eta segidan zuzeneko elkarrizketa eskaini zuen galdakoztarrak, domeka arratsaldean bertan, kate bereko Viva la vida saioan.

Emma García euskal herritarra aurkezle duen asteburu arratsaldeetako saio honetan Cantalapiedrak berak aitortu zuen «urduri baina gogotsu» dagoela Supervivientes saioan aritzeko. Mexikotik bueltan zegoela, orain lau hilabete, eskaini zioten reality honetan aritzea, eta «birritan pentsatu gabe» baiezkoa eman zuela adierazi. Saio honetan parte hartuko duela berriz orain aste bi iragarri zioten, lehiakideak Telecincoko saioan adierazi zuenaren arabera.

Zer dakigu Ainhoaren inguruan?

Azken boladan ez dago Ainhoa Cantalapiedra Galdakaotik ikusteko aukera handirik, tarte gehiena Mexiko aldean egiten baitu. Han publikoki Euskal Herrian eta Espainian baino ezagunagoa da galdakoztarra, abeslariak berak komunikabideetan sarri aitortu bezala.

Garai hartan Espainiako telebista-kate publikoak eskaintzen zuen Operación Triunfo, kantarien reality-a, 2002an irabazi zuenetik lau diska kaleratu ditu abeslariak. Lehenengoa Esencia natural izenburupekoa, zeinekin 50.000 kopia baino gehiago saldu zituen 2003. urtean.

Gaur egun, bere ahotsa Ameriketako zenbait telenobeletako protagonista da, eta Nagore Robles basauriarrak Mitele Plusen gidatu zuen Sobreviviré late-show programaren sarrerako doinua ere grabatu zuen.

Ainhoa Cantalapiedraren azken lana, ADN izenburukoa, 2014an kaleratu zuen, eta geroztik ez dugu bere berri handirik izan, ez behintzat Galdakaon.