Akordio batera iritsi dira Udala eta ETS, Metroaren obretako kamioien lana erregulatzeko

TESTUA: Irati Alonso García
ARGAZKIA: Jon Gomez Garai

Urtarriletik Metroaren obretako kamioiak Unkina eskola ondotik igarotzen ari direla salatu dute usansolotarrek eta honen aurrean kamioiak beste bide batetik bideratzeko lanean ari dira Usansoloko Udala eta Euskal Trenbide Sarea. Bitartean, konpromezu bat hartu du ETS-k: umeak eskolatik sartzen eta irtetzen diren orduetan kamioiak Unkina ondotik ez igarotzea.

Metroaren 5. linearen obren kamioiak ekainean hasi ziren igarotzen Usansolotik. Orduan, Euskal Trenbide Sarearekin batu zen Usansoloko Udala eta ordutegi batzuk finkatu zituzten, «herritarren ongizatea» bermatzeko. ETS-k ordutegiak errespetatu zituen udan zehar eta irailetik urtarrilera bitarte aldiz, kamioiak ez ziren udalerriaren erdigunetik igaro.

Abenduan bilera berri bat izan zuten Udalak eta ETS-k eta honetan kamioiak erdigunetik ez zirela igaroko adierazi zuten proiektuaren arduradunek. Urte hasieran ordea, kamioiak erdigunetik, eta zehazki Unkina eskola ondotik igarotzen ari zirela salatu zuten usansolotarrek.

Honen aurrean, bilera deitu zuen Geltokia Erdigunean plataformak eta honetan Unkinako Guraso Elkartea eta EAJko eta EH Bilduko ordezkariak izan ziren, besteak beste. Hitzorduan adostutakoaren arabera, kamoiak Unkina inguruan debekatzeko ordenantza bat eskatu zioten orduan Udalari, eta horretan lan egingo zuela adierazi zuen honek.

Usansoloko EAJk salatu zuenez, egunak igaro ziren ordutik eta «Udalak ez zuen ezer egin arazo hau konpontzeko». Orain, BINKEri adierazitakoaren arabera, kamioiak beste bide batetik bideratzeko lanean ari da Usansoloko Udala, Euskal Trenbide Sarearekin batera.

Bitartean, konpromezu bat hartu du ETS-k: umeak eskolatik sartzen eta irtetzen diren orduetan kamioiak Unkina ondotik ez igarotzea.