Alokairuen prezioa mugatu ahal izango du Galdakaok
TESTUA: Irati Alonso García
ARGAZKIA: Galdakaoko Udala
Etxebizitzaren Euskal Behatokiak EAEko 41 udalerri tentsiopeko eremu izendatu ditu, tartean Galdakao. Honi esker alokairuen prezioa eusteko neurriak ezartzeko aukera izango da herrian.
Etxebizitzaren Euskal Behatokiak Euskal Autonomia Erkidegoko etxebizitzen alokairuari eta tenkatutako eremuei buruzko azterketa egin du. Honetan adierazi duenez, erkidegoko 251 udalerrietatik 41ek eska dezakete tentsiopeko eremu izendatzea, tartean Galdakao.
Izendapen hau onartzen badu, honi esker etxebizitzen alokairuen prezioa eusteko neurriak ezartzeko aukera izango da Galdakaoko hainbat eremutan.
Eusko Jaurlaritzak egingo du izendapena Galdakaoko Udalak hala eskatuta. Horretarako, justifikazio-memoria bat aurkeztu beharko du, datu objektiboekin eta etxebizitza hornitzeko arrisku berezian oinarrituta. Honek alokairuko eta salmentako prezioen adierazleak jaso behar ditu, baita horien bilakaera eta etxekoen unitateetako errenta erabilgarriaren adierazleak eta haien bilakaera ere.
Halaber, hiru urterako ekintza plana aurkeztuko beharko du, etxebizitza arloan dauden gabeziei erantzuteko.
«Tentsio handiko eremu izendatzea ez da obligazio bat, baizik eta erabili nahi duten udalerriei ematen zaien aukera bat, salbuespenezko eta denboran mugatutako mekanismo bat, eta Udalak eskaera formala egitea eskatzen du», azaldu zuen Pedro Jauregi Eusko Jaurlaritzako Etxebizitzako sailburuordeak azterketaren aurkezpenean.
