Aperribai eta Muguru batuko dituen Galdabusa bihar jarriko da martxan

TESTUA ETA ARGAZKIA: Irati Alonso García

Astelehenean jarri zen martxan auzoen arteko Galdabusaren 2. ibilbidea, Zuhatzu eta Elexalde batzen dituena. Bihar aldiz 1. linea hasiko da, Aperribai eta Muguru artekoa. Albiste honetan batu ditugu ordutegiak.

Herritarren eskaerei erantzunez, astelehenean jarri zen martxan auzoen arteko Galdabusa. Astelehenean bertan aurkeztu zuten proiektua Amets Iturbe Gizarte Ekintza zinegotziak eta Toño González Garraio zinegotziak zerbitzu honetarako zehazki sortu den Zamakoa kaleko geltokian.

Binkek jaso zuenez, «helburua auzoen arteko komunikazioa hobetzea da, eta baita tokiko salmenta bultzatzea ere». Halaber, zinegotziek adierazi zuten «aurrerapausoa» dela kotxeen erabilera murrizteko eta «oinezkoentzako herri atsegin bat eraikitzeko».

Astelehenean 2. ibilbidea jarri zen martxan, Zuhatzu eta Elexalde batzen dituena. Aperribai eta Muguru arteko 1. linea aldiz bihar hasiko da. Azken honen geltokiak hauek izango dira: Aperribai-Unamuno, Aperribai igogailua, Bengoetxe, Sixta Berrenetxea, Urreta, Urretako anbulatorioa, Zamakoa eta Muguru.

Ordutegiei dagokienez, lanegunetan, lehen autobusa 08:00etan aterako da Aperribaitik eta 20:00etan azkena, eta Mugurutik, 08:20ean lehena eta 20:20ean azkena. Asteburuetan eta jaiegunetan 09:40ean izango da lehen autobusa Aperribain eta 20:20ean azkena, eta Mugurun 10:00etan lehena eta 20:40ean azkena. Maiztasuna 40 minuturokoa izango da. 

Ondoko argazkian eta Udalaren webgunean ezagutu daitezke ordutegi guztiak.