Coca Cola lantegiko garbitzaileek soldata %12 igotzeko akordioa lortu dute
Galdakaoko Coca Cola lantegiko garbitzaileek mobilizazioak egin dituzte azken asteetan zehar lan baldintzak hobetzea eskatzeko. ELA sindikatuak iragarri duenez, enpresarekin akordioa lortu dute aurten soldata %12 igotzeko. Albiste honetan batu ditugu akordioaren xehetasunak.
Coca Cola lantegiko garbitzaileak Ocean azpikontrataren langileak dira eta hainbat astetan zehar mobilizazioak egin dituzte lan baldintza «erabat prekarizatuetan» bizi direla salatzeko. Binkek jaso zuen moduan, lan baldintzak hobetzea, egutegi finkoago bat izatea, eta plantilla handitzea eskatzen zuten.
ELA sindikatuak iragarri duenez, akordioa lortu dute enpresarekin 30 langileren baldintzak hobetze aldera. Akordioaren bidez, hauxe erdietsi da: 2000 euroko soldata igoera 2023an; sei pertsona finko gehiago kontratatzea; ITak eta oporrak kubritzea; bai eta 2024rako hitzarmen berri bat negoziatzeko konpromisoa ere.
«Lan baldintza prekarioei aurre egiteko deitutako hamar eguneko grebaren ondoren eta mobilizazioen ostean lortu da akordioa. Beste behin ere argi gelditu da borroka eta grebak lan baldintza hobetzeko tresna eraginkorra direla», azaldu dute sindikatutik.
