EAJk eskualdeko alkategaien aurkezpena egin zuen Galdakaon
TESTUA: Irati Alonso García
ARGAZKIA: EAJ-PNV
EAJk hauteskundeetan eskualdeko herrietan aurkeztuko dituen hautagaien arteko topaketa egin zuen zapatuan, Galdakaoko Ardanza parkean. Besteak beste, Ainhoa Agirregoikoa Galdakaoko alkategaia, Elixabete Etxanobe Bizkaiko ahaldun nagusigaia eta Itxaso Atutxa BBBren presidentea izan ziren ekitaldian.
Maiatzean antolatuko diren hauteskundeetarako prestakuntzan murgilduta daude jada alderdiak, haien artean EAJ-PNV. Jeltzaleek eskualdeko herrietan aurkeztuko dituzten hautagaien arteko topaketa antolatu zuen zapatuan, martxoak 11, Galdakaoko Ardanza parkean.
Ainhoa Agirregoikoa (Galdakao), Asier Iragorri (Basauri), Alberto Ruiz de Azua (Arrigorriaga), Eneko Lekue (Etxebarri), Iker Santocildes (Orduña), Ekaitz Mentxaka (Ugao) eta Karlos Idirin (Zeberio) alkategaiak izan ziren ekitaldian. Halaber, Elixabete Etxanobe EAJren Bizkaiko ahaldun nagusigaiak eta Itxaso Atutxa Bizkai Buru Batzarraren presidenteak partu hartu zuten topaketan.
Hautagai guztiek hitz egin zuten haien herrietako egoeraren inguruan. Ainhoa Agirregoikoa Galdakaoko alkategaiak herrian EAJ-PNVren lana gidatuko duten oinarriak zerrendatu zituen: «Pertsonak ardatz nagusi gisa; auzoak identitate gisa; aparkalekuak, irisgarritasuna eta mugikortasun jasangarria; kirola; enplegua eta sustapen ekonomikoa; eremuak oinezkoentzat jartzea eta modernizatzea; ingurumena eta jasangarritasuna; kultura eta euskara; herritarren parte hartzea eta benetako gardentasuna eta berdintasun politikak sustatzea».
Etxanobek Aldundiaren helburuak zerrendatu zituen, ongizate ekonomikoaren eta kalitatezko enpleguaren aldeko lana, pertsona guztiak zaintzeko eta babesteko beharra, eta zerbitzurik onenak eskaintzeko premia aipatuz.
Atutxak aldiz, erakundeen arteko lankidetzaren onurak nabarmendu zituen, «gure bizilagunen bizi-kalitatea hobetzeko beharrezko tresna gisa». «Egunetik egunera horri eustea ahalegin bat da; ahalegin hori udal-lanetik hasi behar da, eta lurralde-esparrutik babestuta egon behar du», adierazi zuen.
