EH Bilduk Galdakaoko zuzkidura-bizitokien proiektua aurkeztu zuen
TESTUA: Irati Alonso García
ARGAZKIA: EH Bildu
Galdakaoko Udalak 60 zuzkidura-bizitoki eraiki ditu Ibarluzen eta proiektuaren nondik norakoak azaltzeko ekitaldia antolatu zuen EH Bilduk domekan, urtarrilak 21. Hitzorduan Iñigo Hernando alkateak eta Oihana Etxebarrieta EH Bilduko legebiltzarkideak parte hartu zuten, besteak beste.
Auzoak eta Usansolo Herria plataformekin gobernua eratuz Galdakaoko Udalera 2019an heldu zenean, «oso argi» zuen EH Bilduk zuzkidura-bizitokiak «beharrezkoak» zirela Galdakaon, «ez zegoelako mota honetako etxebizitzarik Galdakaon».
Abiapuntu hori hartu eta Eusko Jaurlaritzarekin lanean jarri zen orduan Galdakaoko Udala eta Ibarluzen 60 zuzkidura-bizitoki eraikitzeko proiektua martxan jarri zuten. Dagoeneko egiten ari dira bizitokiak eta eta behin behineko eskaera onartuen zerrenda aurkeztu zuen Udalak, BINKEk jaso zuen moduan.
Proiektuaren nondik norakoak azaltzeko ekitaldia egin zuen domekan, urtarrilak 21, Udal Gobernuaren buru den EH Bilduk. Honetan Iñigo Hernando izan zen Udal Gobernuaren kide batzuekin batera eta alkateak etxebizitzarena «arazo estrukturala» dela nabarmendu zuen: «Udaloi dagokigu horri aurre, baliabideak jarri behar ditugu».
«Horretarako arlo teknikoari heldu behar diogu lehenbizi eta Galdakaon hori egin dugu. Esaterako, lehen aldiz sortu genuen etxebizitza teknikariaren lanpostua», adierazi zuen Hernandok.
Galdakaoko alkateak Ibarluzeko proiektuaren garrantzia azpimarratu zuen: «Etxebizitza hauen proiektua agian urrats txiki bat iruditu daiteke baina jende honentzat etxebizitza proiektua garatu ahal izatea ezinbestekoa da. Jende askok eman du izena eta datorren hilean behin betiko zerrendak argitaratuko dira».
Oihana Etxebarrieta EH Bilduko legebiltzarkideak ere parte hartu zuen Galdakaoko ekitaldian eta «etxebizitzaren arazoak lehentasun osoa behar duela» adierazi zuen. «Nork ez du ezagutzen etxebizitzarako sarbiderako arazoak izan dituenik?», azpimarratu zuen bozeramaileak.
Etxebarrietaren esanetan, Galdakao eta «EH Bilduk gobernatzen duen udalerrietan, baldintzak betetzen direnean, Eusko Jaurlaritzari eskatuko diogu gune tentsionatuak izendatzeko alokairuen prezioa mugatzeko».
