Galdakao Palestinarekin herri plataformak hitzaldia eta proiekzioa antolatu ditu Palestinako eta Libanoko errefuxiatu-esparruetan aritzen den Al Kamandjâti musika-proiektua aurkezteko. Saioa ekainaren 25ean izango da, Ganguren Tabernan.
Al Kamandjâti elkartearen lana ezagutzeko aukera izango da Galdakaon ekainaren 25ean, Ganguren Tabernan. Galdakao Palestinarekin herri plataformak hitzaldia eta proiekzioa musika proiektuaren inguruan, 18:30ean.
Elkarteak hainbat hamarkada daramatza musika irakasten Palestinako eta Libanoko errefuxiatu-esparruetan. Al Kamandjâti Ramzi Aburedwan musikari palestinarrak sortu zuen. Haurra zela, Israelgo soldaduei harriak botatzen zizkien Al Amariko errefuxiatuen kanpalekuan, Ramallah hiriburutik gertu.
Denborarekin, musika bere erresistentzia tresna bihurtu zuen, eta gaur egun, haren erakundeak solfeoa, biolina, lauta eta beste hainbat instrumentu irakasten dizkie milaka haur eta gazte palestinarrei, okupazioaren, blokeoaren edo errefuxiatu egoeraren erdian bizi direnei.
Duela gutxi, Bilboko Kontserbatorioko bi irakasle Al Kamandjâtik Ramallah hirian duen eskolan izan dira, bi erakundeen arteko lankidetza bideak aztertzeko. Bisita horrek lotura sendoak sendotzen ditu Euskal Herriaren eta Palestinaren artean, eta musikak testuinguru zailetan duen eraldatzeko ahalmena balioan jartzen du.
