Euskaraldiaren gune ibiltaria Galdakaon izango da bihar
TESTUA: Irati Alonso García
ARGAZKIA: Euskaraldia
Maiatzaren 15etik 25era antolatuko da aurtengo Euskaraldia eta honezkero zabalik dago ekimenean izena emateko epea. Bihar, martxoak 20, Euskaraldiko gune ibiltaria Galdakaoko Iturrondo plazan izango da eta honetan izena emateko eta arropa erosteko aukera izango da, besteak beste.
Euskararen erabilera bultzatzeko helburua duen Euskaraldia ekimena maiatzaren 15etik 25era antolatuko da aurten, ‘Elkar mugituz egingo dugu’ lemapean. Galdakaok bat egingo du aurten ere egitasmoarekin eta pasa den barikuan aurkeztu zuten Hamaikakoa, BINKEk jaso zuen moduan.
Ekimenean izena emateko epea zabalik dagoeneko maiatzaren 15era bitarte eta webgune bitartez egin daiteke, eta baita herrietan jartzen ari diren buzoietan ere. Galdakaon puntu hauetan ezarri dituzte:
- Musika eskolan
- Anbulatorioan
- Udaletxean
- Urretako kiroldegian
- Elexaldeko kiroldegian
- Santa Barbaran
- Barandiaran AEK Euskaltegian
- Udal Euskaltegian
- Torrezabal Kultur Etxean
Bestalde, Euskaraldiaren gune ibiltaria helduko da Galdakaora bihar, martxoak 20. Iturrondon kokatuko da 17:00-20:00 ordutegian, eta egitasmoan izena emateko eta arropa erosteko aukera izango da.
