«Ez goaz bide onetik», Arnas Dezagun taldea
Ainhitze Bizkarralegorra Bravo, Mitxel Elortza Exea eta Irune Soto Aldalur
BINKE / 2022ko azaroa
Arnas Dezagun haur euskalhiztunen guraso taldea da, hezkuntzarekin eta bereziki murgiltze ereduarekin kezkatuta daudenak eta eskoletan haur euskalhiztunak ez sakabanatzeko proposamena egiten dutenak. Talde horretan Euskal Herri osoko gurasoak daude, eta tartean zenbait galdakoztar ere. Ondoko iritzi artikulua galdakoztarretariko batek ere sinatu du.
Arnas Dezagun guraso taldeko gurasook kezkaz jarraitzen dugu Hezkuntza Lege berriaren bilakaera. Legearen aurreproiektua ezagutu genuen duela egun batzuk, eta gure kezkak areagotu besterik ez dira egin. Gure seme-alabek euskara gehiago jakingo dutela dioten arren, nekez lortuko da hori euskara orduak gutxituta. Gaztelania eta ingeles orduak biderkatu egingo dira, eta euskarazko ikastorduak neurri berean gutxitu.
Egun D ereduak ikasleak euskalduntzeko dituen zailtasunak ikusita, nola pentsatzen dute gure agintariek konponbidea euskara orduak gutxituz iritsiko dela? Gainera, are kezkagarriagoa iruditzen zaigu legearen aurreproiektu honek inolako oposiziorik jaso ez izana.
Murgiltzearen eta arnasguneen aipamenik ez dago legearen aurreproiektu berrian. Gure proposamenak eta eskariak helarazi genizkien arren, legearen aurreproiektuak ez du haur euskaldunen sakabanaketari, bazterketari eta estres linguistikoari amaiera emateko inolako neurririk aipatzen. Hori gutxi ez, eta aurreproiektuak ez du zehazten ikasleen euskara maila bermatzen ez duten eskolek zer egin beharko duten euskara maila nahikoa ziurtatzeko.
Euskara maila zehazteko proposatzen den prozedura ere (ikastetxeko bertako irakasleen bitartez) ez zaigu egokia iruditzen. Kanpo-ebaluazioa behar du, ikasleen maila inpartzialtasunez neurtuko bada.
Hitz politekin apaindu nahi izan duten legearen aurreproiektu honek zehaztasun gutxi dakartza, eta neurriak oso eskasak. Euskararekiko atxikimendua eta erabilera maldan behera doazen garai honetan, gure agintariek erderen aldeko hautua egin dutela dirudi, gaztelera irakas hizkuntza bilakatuta ordu gehiago eskainiz ikasle guztiek ondo baino hobeto jakin arren, eta (gutxienez) ingelesa ere irakats hizkuntza bihurtuz, ingelesez emandako edukien kalitatearen kaltetan. Eredu “aniztuna” proposatu bezala orokortzen bada, ikasleen euskarazko gaitasunak are beherago egingo duela ondorioztatzeko ez dago aditua izan beharrik.
Lege aurreproiektu honekin, haur etxetik euskaldunak egun baino are azkarrago erdaldunduko dira, eta haur etxetik erdaldunentzat, euskara are arrotzagoa eta deserosoagoa bihurtuko da. Urte askotako atzeraldia ekar dezake Hezkuntza Lege berriak Aurreproiektua zuzentzen ez bada, gure ustez. Kinka estu honetan, arduraz eta koherentziaz jokatzeko eskatu nahi diegu eragile eta alderdi euskaltzaleei. Ez goaz bide onetik.
