Galdabusak telefono mugikorrarekin ordaintzeko aukera aktibatu du
TESTUA: Irati Alonso García
ARGAZKIA: Jon Gomez Garai
Beste garraio batzuetan egindakoa jarraituz, Galdabusean telefono mugikorrarekin ordaintzeko aukera jarri dute. Oraingoz, 15 eta 65 urte bitarteko pertsonek eta Android gailua dutenek erabil dezakete Barik Mobile aplikazioaren bitartez.
Bizkaibusek, Metroak, Euskotrenek edo Bilboko tranbiak Barik Mobile aplikazioaren bitartez ordaintzeko aukera ematen dute dagoeneko. Aplikazio honen bitartez telefono mugikorrarekin ordaindu ahal da, txartel fisikoa erabili gabe.
Galdabusa ere funtzionalitate honetara batu da eta oraingoz, 15 eta 65 urte bitarteko pertsonek eta Android gailua dutenek erabil dezakete Barik Mobile aplikazioa Galdakaoko auzoen arteko autobusean.
Aukera horretaz gozatzeko, beharrezkoa izango da aplikazioa Google Play Storen deskargatzea eta NFC teknologia duen gailu bat izatea (telefono gehienek dute gaur egun). Gizatrans titulua duten pertsonek hilabete batzuk itxaron beharko dute oraindik Barik Mobile erabili ahal izateko.
Aplikazio honek informazio zehatza ere jasotzen du, hala nola egindako azken mugimenduak, kargaren egiaztagiriak, MovEuskadi bidaien planifikatzailea, Bizkaiko garraioaren mapa, Barik sistemaren informazio guztia eta tituluak kargatzeko aukera.
