EAEko ikastetxeetan 420 hobekuntza-lan inguru egiteko, 6 milioi euro inbertituko ditu Eusko Jaurlaritzak uda honetan. Proiektuaren baitan Ikaslab guneak ezarriko ditu Elexalde institutuan.
Eusko Jaurlaritzak 420 jarduketa baino gehiago bultzatuko ditu uda honetan Euskadiko 270 ikastetxe ingurutan, 6 milioi eurotik gorako inbertsioarekin.
Esku-hartze horiek udako hilabete hauetan egingo dira, ikastetxeek datorren ikasturtean azpiegitura irisgarriagoak eta ikasleen beharretara egokituak izan ditzaten.
Bizkaian egingo da programako inbertsiorik handiena, 3,7 milioi euro baino gehiagorekin, 280 jarduketa inguru garatzeko lurraldeko 60 udalerri baino gehiagoko 160 bat ikastetxetan.
Esku-hartzeen zati handi bat hezkuntza-inklusioa indartzera eta ikastetxeak ikasteko modu berrietara egokitzera bideratuta egongo da. Arlo horretan, hamar ikastetxetan ikasgela egonkorrak sortu edo egokituko dira.
Hezkuntza-berrikuntzaren aldeko apustuak ere pisu handia izango du Jaurlaritzak jakinarazi duenez, lurraldeko hogei bat ikastetxetan Ikaslab guneak ezarriko baitira, eta proiektuak urteko bigarren seihilekoan garatuko dira.
Horien artean dago Galdakaoko Elexalde BHI, Portugaleteko Antonio Trueba IPZ, Markina-Xemeingo Markina BHI, Bilboko Zazpilanda HLHI, Trapagarango San Gabriel HLHI, Bermeo BHI, Santurtziko Las Viñas HLHI-rekin batera, besteak beste.
Ikaslab guneak espazio fisiko malgu eta argiak dira, eta bertan metodologia aktiboa erabiltzen da, ikaslea ikasketa prozesuaren protagonista bihurtuz.
