Galdakaoko gazteak gaztelania erabiltzen «erosoago» sentitzen dira

TESTUA: Irati Alonso García
ARGAZKIA: Galdakao Gazt

Galdakao GazT ekimenak herriko gazteek euskararekiko duten jarreraren inguruko azterketa egin du eta honetan, besteak beste, «gehienak gaztelania erabiltzen erosoago sentitzen direla» ondorioztatu du. Deskargatu azterketa osoa ondoko albistean.

Galdakaoko gazteriak euskararekiko duen iritzia eta sentipenak ezagutzeko helburuz, azterketa bat gauzatu eta argitaratu du Galdakao GazT ekimenak, herriko gazteentzako zerbitzu guztiak batzen dituenak.

Azterketa egiteko herriko gazteak elkarrizketatu dituzte aurrez aurre eta sare sozialen bidez egindako galdetegi baten bitartez, eta honek hiru atal izan ditu. Lehenengo atalean euskararekiko izan duten lehen harremana eta ezagutza maila aztertu da. Bigarrenean aldiz, euskararekiko duten sentimendua ezagutzera bideratu da eta azkenekoa gazteen artean euskararen erabilera sustatzeko proposamenei buruzkoa izan da.

Behin azterketa eginda eta ondorioak aterata, hauen inguruko hausnarketa egin dute arduradunek, hainbat alor azpimarratuz. Batetik, orokorrean gazte galdakoztarrak gaztelaniaz «erosoago» sentitzen direla adierazi dute, egunerokoan erabiltzen duten hizkuntza delako.

Bestetik, gazte gehienek euskara eskolan ikasi dutela ondorioztatu du azterketak, eta hauetan euskara irakasteko modua «ez dela egokiena» uste du Galdakaoko gazteriak. Aipatzekoa da, ama hizkuntza euskara duten gazte askok ere, kuadrillan gaztelaniaz hitz egiteko ohitura dutela.

Azkenik, hauek eta beste hainbat faktore kontuan hartuz, «esan dezakegu gazteen artean ez dela euskara erabiltzen testuinguru konkretuetan ez bada», adierazi dute Galdakao Gazt ekimenetik.