Galdakaoko Helduen Hezkuntzako ikasleek Gernikara irteera-kulturala egin zuten
TESTUA: Irati Alonso García
ARGAZKIA: Galdakaoko Helduen Hezkuntza Ikastetxea
Ikasturtean zehar gizarte-eremuan lantzen dituzten bi gairekin zerikusia dutela aprobetxatuz, martxoaren 6an bisita bikoitza egin zuten Galdakaoko Helduen Hezkuntzako ikasleek Gernikan. Batzar Etxean izan ziren eta asteleheneroko merkatua ezagutu zuten.
Galdakaoko Helduen Hezkuntzako ikasleak, ‘Munduaren antolaketa politikoa. Estatua’ izenburua daraman gaian, Europa, Espainia eta Euskal Autonomia Erkidegoko erakundeak aztertzen ari dira. Gai horrekin lotura zuzena duenez, Gernikako Batzar Etxera bisita antolatu zuten zentroko arduradunek.
Pasa den astelehenean, martxoak 6, joan ziren Batzar Etxera eta hau osatzen duten gune ezberdinak aztertu zituzten: Batzar Aretoa, Leiarpeko Aretoa, eta kanpoaldean dagoen Gernikako arbola. «Euskaldunek munduan zehar daukagun ikurrik entzutetsuena, denboraren poderioz, herri oso baten borondatearen eta erakunde berezi batzuen ikur bihurtu den haritza da», azaldu zuten irakasleek Gernikako arbolaren inguruan.
Bestalde, ‘Mundua, ekonomia globalizatua’ eta ‘Ekoizpen eta kontsumo arduratsua’ gaiak ere lantzen ari dira Helduen Hezkuntzako ikasleak eta honen harira Gernikako merkatua bisitatu zuten. Pasa den lauhilekoan MercaBilbaora joan ziren eta Gernikakoa ezagutu ostean eredu biak alderatzeko aukera izango dute.
