Galdakaoko Udalaren Ekonomia Arloa Esan ondoko lokalera lekualdatu da
TESTUA: Irati Alonso García
ARGAZKIA: Galdakaoko Udala
Esan herritarren arretarako bulego ondora lekualdatu du Galdakaoko Udalak Ekonomia Arloa, «kudeaketa eraginkorragoa, elkarlana, gertutasuna eta modernizazioa oinarri dituen funtzionamenduaren bideaan jarraitzeko». Diruzaintza eta Kontu Hartzailetzako alorreko langileak lokal berrian arituko dira hemendik aurrera.
Azken urteetan berrikuntzak martxan jarri ditu Galdakaoko Udalak bere barne funtzionamendua hobetzeko helburuz. Batetik, udal gobernuarentzat estrategikoak diren hainbat lanpostu sortu eta egonkortu ditu eta bestetik, kudeaketa eraginkorragoa egiteko helburuz, antolaketa eredu berriak ezarri ditu.
Honen ondorioz, espazioen erabilera berriak sortu dira eta elkartu eta batzartzeko gune gehiago ditu orain udaletxeak. Pleno aretoa esaterako, balio anitzeko aretoa bihurtu da.
Aste honetan aldiz, beste lekualdaketa bat egon da: Ekonomia Arloarena. Aurrerantzean Esan herritarren arretarako bulegoaren ondoan egongo da eta Diruzaintza alorreko sei udal langileak eta Kontu Hartzailetzako bostak lokal berrian arituko dira.
«Apurka apurka, etorriko dira egokitzapen gehiago ere, kudeaketa eraginkorragoa, elkarlana, gertutasuna eta modernizazioa oinarri dituen funtzionamenduaren bidean pausoak ematen jarraituko baitugu», adierazi du Galdakaoko Udalak.
