Galdakaoko zazpi kirol erakundek ‘Kirolean be euskaraz’ egitasmoarekin bat egin dute
TESTUA: Irati Alonso García
ARGAZKIA: Galdakaoko Udala
Kirol esparruan euskara sustatzeko helburuz, ‘Kirolean be euskaraz’ ekimena jarri zuen martxan Galdakaoko Udalak eta hainbat erakundek bat egin zuten egitasmoarekin. Orain beste zazpi batu dira haur eta nerabeekin lan egiten duen ekimenera. Hemen batu dugu zerrenda.
Eskolatik kanpo euskararen erabilera sustatzeko helburuarekin jarraituz, ‘Kirolean be euskaraz’ ekimena abiarazi zuen Galdakaoko Udalak duela hilabete batzuk. Orduan hamaika erakunde galdakoztar batu ziren ekimenera eta orain beste zazpik egin dute bat.
Zehazki, Adiskide Pilota Elkarteak, Ibaizabal Saski-baloi Taldeak, Galdakao Atletismo Taldeak, Galdakao Boleibol Taldeak, GDKO Igeriketak, Galdakao Futbol Taldeak eta Txirrindularitza Gelak parte hartuko dute ekimenean aurrerantzean.
Erakunde hauek aurten ‘Kirolean be euskaraz’ programak herrian haur eta nerabeekin lanean ari diren kirol zuzendaritzei hizkuntza aholkularitzaren eta irizpideen inguruko lan saioak eskaintzen hasi dira, taldearen ohiko jardunean euskara erabil dezaten.
«Estrategikoa da kirola; izan ere, umeen %85ak kirola egiten du. Proiektu honekin lor daitekeena da euskararekiko duten pertzepzioa positiboa izatea. Ume batek bere kirol erreferentean, hezkuntza ez formaleko aisialdian, euskara entzuten badu, ohitu egingo da euskara bere egunerokotasunean, eskolatik kanpo ere entzutera. Eta esperientzia positiboarekin lotuko du», azaldu dute Udaletik.
