Geltokia Usansoloko erdigunean bideragarria den ezagutzeko azterketa propioa egingo du Udalak
TESTUA: Irati Alonso García
ARGAZKIA: Geltokia Erdigunean
Metroaren 5. linearen proiektuaren baitan Usansoloko erdigunean geltoki bat ezartzea bideragarria den ezagutzeko azterketa propioa egingo du Usansoloko Udalak. Horretarako, aurtengo aurrekontuko 25.000 euro bideratuko ditu.
Usansolotarrek herriko erdigunean Metro geltokia ezartzea eskatzen jarraitzen dute, batez ere Geltokia Erdigunean plataformak deitutako mobilizazioen bitartez. Orain arte Sener enpresak egindako azterketa izan dute oinarri eskaera egiteko baina EAJ-PNVk azterketa propioa egitea eskatu zion Udalari.
Eskaera aurtengo aurrekontuen baitan sartu eta horretarako 25.000 euro bideratzea onartu zuen Usansoloko Kudeaketa Batzordeak azken osoko bilkuran. BINKEk jaso zuen moduan, 8,9 milioi euroko aurrekontua izango du aurten Usansolok.
Geltokia Erdigunean plataformaren hitzetan, «Udalak egingo duen azterketa propio hau eskuan dugunean beste oinarri bat izango dugu presioa egin eta gure aldarrikapenarekin jarraitzeko. Gure helburua proiektuaren arduradunek iritziz aldatzea eta geltokia erdigunean planteatzea da». Azterketaren epeei dagokionez, Udalak ez du oraindik zehaztu noiz egingo den, «enpresa bati esleitu behar zaiolako lana lehenbizi».
Azterketa honen berri eguaztenean, martxoak 12, eman zien Geltokia Erdigunean plataformak herritarrei, San Andres parrokian egindako asanblada irekian. Honetan plataformak alderdi politikoekin izandako bileren edukia azaldu zuen ere. «PSE-EEk ez du geltoki bat aurreikusten erdigunerako momentuz baina alderdiak dio egotekotan ez litzatekela egongo Senerrek hasieran aurreikusitako lekuan», azaldu dio BINKEri Jon Atxutegi plataformako kideak. «Guk honekin ulertzen duguna hauxe da: proiektua ez dago itxita, aldaketak egitera irekita dago», adierazi du.
EAJ-PNVrekin ere batu da plataforma, eta jeltzaleek «beti datuak oinarri izango dituela» azpimarratu zuten. «Esan ziguten momentu horretan ez zutela PSE-EEren azken proposamenen berri baina galdetuko zutela», azaldu du Atxutegik.
