Greba mugagabea egingo dute Maxameko langileek otsailaren 16tik aurrera
Ekonomia
BINKE / 2022ko otsaila
Greba mugagabea egingo dute Maxameko langileek otsailaren 16tik aurrera
TESTUA: Jon Gomez Garai
ARGAZKIA: Binkeren artxibotik, 2021eko martxoan egin zuten grebakoa
Urtarrilaren amaieran Binkek adierazi zuen bezala, Zuhatzuko lehergaien enpresak kirol-kartutxoak egiteari utzi gura dio. Langileek zuzendaritzarekin izandako bileran ez dutenez asmoen aldaketarik igarri, datorren eguaztenean greba mugagabea hasiko dute lantegi osoan.
Binkek urtarrilaren 27an iragarri zuen Zuhatzuko lehergaien Maxam enpresak kirol-kartutxoak egiten dituen atala erabat ixteko asmoa zuena. Bada, gaur —konpainiako zuzendaritzarekin izandako bileraren ostean «eta zuzendaritzak ezer barririk proposatu ez» duelakoan— domeka honetarako asanblada informatiboa deitu du enpresa-batzordeak, datorren eguaztenerako greba mugagabean hastea erabakitzeko.
«Greba mugagabea egitearen erabakia hartuta dago eta sindikatuon gehiengoak ez dogu bozkatzea beharrezko ikusten», adierazi berri dio sindikatu nagusiko bozeramaileak Binkeri, «baina sindikatu bakarrak —18 ordezkaritik bi baino ez dituenak—, langileak zatitzeko asmoagaz domeka honetan bozketa egitea eskatu dau».
Hala ere, domeka honetarako lantegian bertan 11:00etan deituta dagoen asanbladan «ez badu gehiengoak bozkatzeko beharra azaleratzen», bozkatu barik adostuko da otsailaren 16an greba mugagabeari ekitea. Greba hau Galdakaoko Maxam lantegi osoan egiteko asmoa dute sindikatu guztiek, ez bakarrik kirol-kartutxoak egiten dituen Outdoor atalean.
Langileek lan-taldearen %100 mantentzea gura dute, behin-behinekoak diren baina behin betiko beharko luketen langileak erregularizatzea, kaleratzerik ez egotea eta Zuhatzuko lantegia bizirik mantentzea exijitzen dute. Horretarako, hainbat neurri proposatu dizkiote zuzendaritzari, besteak beste: lau urteko borondatezko eszedentziak hartu ahal izatea, erretiroa «modu duinean» hartu ahal izateko errenta planak indarrean jartzea edota langileak gura badu enpresaren beste lantegi batzuetara lekualdaketak baimentzea.
