Haurrentzako hiri udalekuetan izena emateko epea apirilaren 28an zabalduko da
TESTUA: Irati Alonso García
ARGAZKIA: Stickets
Aurten ere 4 eta 11 urte bitarteko haurrei zuzendutako hiri udalekuak antolatuko ditu Galdakaoko Udalak,Aperribai, Urreta eta Gandasegi ikastetxeetan. Hauetan izena emateko epea zabalik egongo da apirilaren 28tik maiatzaren 9ra bitarte.
Galdakaoko Udalak urtero antolatzen dituen hiri udalekuak uztailaren 1etik 24ra izango dira aurten. Zehazki, 4 eta 11 urte bitarteko haurrentzat 560 plaza eskainiko ditu Aperribai, Urreta eta Gandasegi ikastetxeetan.
Aurtengo gaia ‘Olinpiada sortzaileak: gorputza, burua eta artea mugimenduan’ izango da eta izena emateko epea apirilaren 28tik maiatzaren 9ra bitarte zabalduko da. Galdakaon erroldatutako haurrek izango dute eskaera egiteko lehentasuna.
Berritasun gisa, aurten dagokion kuotaren ordainketa izena ematen den unean bertan egingo da, beraz, izena ematen duten galdakoztar guztien parte hartzea bermatuko da. Izen-ematea Udalaren webgunearen bitartez egin ahal izango da soilik, eta bertan egingo da ordainketa.
Galdakoztarren izen emateak kudeatu, egiaztatu eta onartu ondoren plaza libreak badaude, herrian erroldatuta ez dauden pertsonek hiri udalekuetan parte hartu ahal izango dute.
Urtero bezala, hiru txandatan banatuko dira udalekuak: uztailaren 1etik 11ra, 14etik 24ra eta bestea hilabete osoan zehar, 1etik 24ra. Astelehenetik barikura izango dira (jaiegunak izan ezik), 09:30-13:30 ordutegian, eta hautazko zerbitzuak eskainiko dira: jantokia, 13:30 eta 14:30 bitarte, eta goizeko eta jantoki osteko harrera zerbitzua (doan, ordubete lehenagoko eta beranduagoko tartearekin, hurrenez hurren).
Udalekuen prezioan hobariak egingo ditu Udalak diru-sarreren arabera, eta hauen xehetasunak Udalaren webgunean ezagutu daitezke.
