Herriko merkataritza txikia sustatzeko dirulaguntza berriak emango ditu Galdakaok
TESTUA: Irati Alonso García
ARGAZKIA: BINKE
Atzo, irailak 26, osoko bilkura egin zuen Galdakaoko udalbatzak eta honetan hainbat erabaki hartu zituzten alderdiek. Besteak beste, herriko merkataritza txikia sustatzeko dirulaguntza berriak ematea onartu zuten.
Udako etenaldiaren ostean, Galdakaoko udalbatzak ikasturteko lehen osoko bilkura egin zuen atzo, irailak 26. Honetan, hainbat izan ziren eztabaidagaiak eta herriko merkataritzari buruzko erabaki garrantzitsu bat hartu zen.
Zehazki, Galdakaoko merkataritza txikia sustatzeko dirulaguntza berriak ematea onartu zuten alderdiek. EH Bildu, UH, Auzoak eta EAJ-PNVren babesarekin, eta PSE-EEren abstentzioarekin adostu zen neurria, eta hiru lerro izango ditu:
- Dendarik ez dagoen auzoetan oinarrizko beharrak aseko dituzten denda txikiak zabaltzeko diru-laguntzak. Aperribai, Zuatzaurre, Tximelarre, Bengoetxe, Olabarrieta eta Urtebietan auzoko dendak zabaltzea sustatzeko, lokalen alokairua eta inbertsioak ordaintzen laguntzeko neurria da
- Herriko komertzio guneetan dendak ixtea saihesteko helburuz, berritze, modernizatze eta hobetzeak egiteko inbertsioak diruz lagunduko dira
- Paisaia linguistikoa euskalduntzeko laguntzak. Irudi korporatiboa, errotulazioa, webguneak eta publizitatea euskaraz egitea lagunduko du. «Udalak euskara zeharkako lerrotzat duenez», Sustapen Ekonomikorako Arloak hartu du beregain merkataritzan euskara normalizatzeko diru-laguntzak kudeatzea
Lerro hauek oposizioko bi taldeen hainbat emendakin jasotzen dituzte. EAJ-PNVk esaterako, laguntza horiek merkataritza-dentsitate txikiko eremutzat jotzen diren beste auzo batzuetara ere zabaltzea eskatu zuen, eta baita saltoki berriak irekitzeko sustapenean, alokairuagatiko dirulaguntzaren zenbatekoa 24 hilabetera gehienez mugatzea, 12 hilabeteren ordez.
