Ibaizabal Saskibaloi Taldeko neskak LF2 ligara igo dira
TESTUA: Irati Alonso García
ARGAZKIA: Euskal Saskibaloi Federazioa
Ibaizabal Saskibaloi Talde galdakoztarreko neskek LF2 ligara igotzea lortu dute. Asteburuan Hotel Maya Alicante, CB Zaragoza eta Spar Gran Canaria taldeen kontra jokatu zuten eta hiru partidak irabazi zituzten.
Denboraldi arrakastatsu baten ondoren, Ibaizabal Saskibaloi Taldeko neskek LF2 ligara igotzea lortu dute. Ligan lehen postua lortu zuten eta honi esker igoera fasea jokatu zuten asteburuan Malagan.
Lehen partidan, Alicanteren kontra, galdakoztarrek zortzi puntuko desabantailari buelta eman behar izan zioten; eta defentsa lanari esker, aurkaria hirugarren eta azken laurdenean garaitu zuten.
Bigarren partida Spar Gran Canariaren aurka izan zen. Atsedenaldian puntu bakar bategatik irabazten zuen taldeak, lehen laurdenean 17-24 nagusitzea lortu ondoren. Hirugarrenean sei punturaino urruntzea lortu zuten eta azken laurden parekatu batean Gran Canaria taldea markagailuan oso gertu jarri zen. Azken txanpan ordea Ibaizabalek garaipena lortu zuen eta horrebestez hurrengo denboraldian LF2 ligan jokatuko du.
Azken jardunaldian, presiorik gabe, galdakoztarrek Zaragoza taldearen kontra irabazi zuen 77-60.
«Igoera fase borobil baten ostean, gure neskek LF2 ligan merezitako tokia lortu dute berriz ere! Zelako familia batu garen Malagan, taldea bultzatuz une oro, hau zuon guztiona da!», adierazi zuten klubetik.
