Ibilaldiak otsailaren 21ean aurkeztuko duen abestiaren bideoklipa asteburuan grabatzen hasi dira
TESTUA: Irati Alonso García
ARGAZKIA: Jon Gomez Garai
Eguzkibegi Ikastolak aurtengo Ibilaldia antolatuko du maiatzaren 25ean eta honetarako atzera kontaketa ofiziala otsailaren 21ean hasiko dute. Egun horretan Ibilaldiaren abestia eta bideoklipa aurkeztuko dituzte eta pasa den asteburuan hasi zituzten azken honen grabaketak.
Eguzkibegi Ikastolak 2009an antolatu zuen lehen aldiz Ibilaldia eta aurten ere hartuko du ardura hori, kasu honetan maiatzaren 25ean. Edizio honetarako motorrak berotzen hasi dira honezkero eta otsailaren 21ean izango da atzera kontaketa ofizialaren hasiera.
Egun horretan arratsaldean —ordua oraindik zehazteke dago— Ibilaldiaren abestia eta bideoklipa aurkeztuko dituzte. Aurkezpenean abestia nork egin duen eta bideoklipa nolakoa den ezagutzera emango du Ibilaldiaren antolakuntzak.
Bata zein besterako grabaketak hasi dira honezkero eta asteburuko bi egunetan bideoklipa grabatzen izan ziren Galdakaon. BINKEk bideoklipari buruz aurreratu dezakeen gauza bakarra Eguzkibegi Ikastolako hainbat ikaslek, irakaslek eta gurasok parte hartu duela da. Abestiaren egilea aldiz, otsailaren 21ean bertan jakinaraziko da.
