Ikus-entzunezkoa
BINKE / 2021eko otsaila

Itoiz taldeak Galdakaon eskaini zituen kontzertuetako irudien bila ari dira

TESTUA: Jon Gomez Garai
ARGAZKIA: Juan Luis Markaida

Itoiz taldearen inguruan dokumental bat prestatzen ari dira, eta horretarako talde historikoak Galdakaon eskaini zituen kontzertuetako argazki, grabazio edo artikuluak batu gura dituzte egileek.

Mutrikuko gazte batek, Juan Carlos Perezek, 70eko hamarkadaren amaieran rock talde bat sortu nahi zuela erabaki zuen. Hamar urte beranduago, talde horrek estadioak bete eta salmenta-markak hausten zituen. Euskal musikaren panoraman erreferente bilakatu zen: Itoiz.

Horregatik, Doxa Producciones taldea Itoizen inguruan datorren urte amaieran argitaratuko duen dokumental bat prestatzen ari da, bere sasoiko irudi, grabazio eta artikuluak bilduta.

Ibilbide labur baina erabat arrakastatsu horretan, musika talde mitikoak Galdakaon ere eskaini zuen kontzertu bat baino gehiago —Ruper Ordorikak Binkeri kontatu zion legez— eta ikus-entzunezko lanaren egileak Itoizek gurean eman zituen kontzertuko argazkiak, soinu- zein bideo-grabazioak edo garaian argitaratutako prentsaren artikuluak ere batu gura ditu.

Horregatik, ekoizpen etxea hedabide honekin jarri da harremanetan, «Binkek galdakoztarren artean mezua zabaldu dezan». Horrela azaldu diote medio honi:

«Taldearen erregistroren bat izan dezaketen pertsona guztiengana heldu nahi dugu, artikulu, argazki, bideo edo soinu grabazioak biltzeko asmoz. Taldea 1976an hasi zen eta 1988an desegin zen. Gure informazioen arabera, badakigu taldeak Galdakaon jo zuela baina ez dakigu zehatz zein urtetan. Gainera, Itoiz izenarekin ezagunak egin baino lehen, Indar Trabes izenarekin ibili ziren jotzen eta baliteke sasoi hartako materiala horrela oroitu/gorde izana».

Dokumentala osatzeko edukiek ez dute goi-mailakoak izan behar, egileek badakitelako garai hartan ez zirela gaur egungo baliabideak erabiltzen, eta galdakoztarrak animatu gura dituzte euren etxeko fitxategian bilatzera: «Orain arte informazio ugari bildu dugu baina badakigu oraindik argitara atera ez den materiala egon daitekeela eta material mota hori lortzea da interesatzen zaiguna, profesionala edo afizionatua, kalitatezkoa edo etxekoa izan».

Itoizek gutxienez Galdakaon kontzertu bi eman zituen. Beraz, norbaitek saio horietako materialik —irudi, bideo, grabazio edo prentsako artikulurik— baldin badu, Binkeren ondoko kontaktuetariko batera bidal ditzake eduki horiek: info@binke.eus helbidera edo 680743211 telefono zenbakira, WhatsAppetik zein Telegrametik. Material horrekin batera adierazi beharko da egilearen edo jagolearen izen-abizena.

Binkek jasotako eduki guztiak batu eta bidaliko dizkio dokumentalaren egileari.