‘Kanporamartxo’ irteera antolatu dute Usansolon domekarako
TESTUA: Irati Alonso García
ARGAZKIA: Burtotza Mendi Taldea
Jada tradizio bihurtu den ‘Kanporamartxo’ irteera antolatu dute Usansoloko Burtotza Mendi Taldeak eta Usansolon Euskaraz Taldeak domekarako, otsailak 23. Goizeko 9:00etan irtengo dira Unkina plazatik eta Gorosibai, Erlotxueta, Trokarro, Uraska, Basozabal, Arteta eta Ordañe igaroko dituzte parte-hartzaileek.
Urtean zehar hainbat irteera antolatzen ditu Usansoloko Burtotza Mendi Taldeak eta otsailean ere inguruko mendietan murgiltzeko aukera eskainiko du. Zehazki, jada tradizio bihurtu den ‘Kanporamartxo’ txangoa antolatu du domekarako, otsailak 23, Usanson Euskaraz Taldearekin batera.
Unkina plazatik abiatuko dira 09:00etan eta hauxe da egingo duten ibilbidea: Gorosibai-Erlotxueta, Trokarro, Uraska, Basozabal, Arteta-Ordañe-Usansolo. Ostean, hamaiketakoa egongo da.
Burtotza Mendi Taldeak azaldu duenez, ‘Kanporamartxo’ irteeran jan ohi den hamaiketakoa haiek eramango dute. Edozeinek parte hartu dezake irteeran baina umeak nagusi baten ardurapean joan beharko dira.
