Kirolean «kalitatezko inklusioa» lortzeko neurriak lantzen ari da Galdakaoko Udala
TESTUA: Irati Alonso García
ARGAZKIA: G. Goth
Galdakaoko Udalak ikerketa egin du dibertsitate funtzionala duten pertsonen egoerari eta kirol arloan duten inplikazioari buruz, eta honek zenbait behar agerian utzi ditu. Hauei erantzuna emateko, hainbat neurri lantzen ari dela iragarri du.
Bizkaiko Foru Aldundiko Kirol Zuzendaritzarekin eta Haszten Fundazioarekin lankidetzan, dibertsitate funtzionala duten pertsonen egoerari eta tokiko kirol esparruan duten inplikazioari buruzko diagnostikoa egin du Galdakaoko Udalak.
Ikerketaren arabera, dibertsitate funtzionala duten 49 pertsonek egiten dute kirol jardueraren bat Galdakaon, eta gizonezkoak dira gehienak, %84,4. Batez besteko adina 13 urte ingurukoa da eta ia guztiek, %91,8k, 6 eta 20 urte artean dituzte. %6,1ek 21 eta 40 urte artean dituzte, eta %2k 41 eta 60 urte artean, berriz, %2koa.
Behaketak ez du aurkitu dibertsitate funtzionala duen eta 60 urtetik gorakoa izanda kirol jardueretan parte hartu duen inor. Kirolari dagokionez, hiru praktikatzen dituzte: saskibaloia %50ek, igeriketa %25ek eta mahai tenisa %25ek.
Pertsona horiek eta Galdakaoko hezkuntza eta kirol eragileek udalerriko kirol eremuan benetan eta eraginkortasunez parte hartzen dutela bermatzeko euren eskaerak aurkeztu dituzte. Hala, «ikusi da beharrezkoa dela gorputz eta kirol jarduera egokitu eta inklusiboen eskaintza zabaltzea, kirol instalazioetako irisgarritasuna hobetzea, dibertsitate funtzionalean trebatutako eta esperientziadun profesionalak izatea, eta kolektibo horri zuzendutako jardueren komunikazioa eta hedapena hobetzea».
Honen aurrean, Galdakaoko Udalak premia horiei erantzuteko hainbat jarduera abian jartzeko mekanismoak identifikatu eta aktibatu ditu. Izan ere, «agerikoa da dibertsitate funtzionala duten pertsonek zailtasunak dituztela udal zerbitzu eta programetan parte hartzeko».
Egoera hori hobetzeko urratsak egiten hasi da, Galdakao «udalerri inklusiboagoa izan dadin eta pertsona guztiek gizarte eta kirol partaidetzarako aukera berdinak izan ditzaten».
Proposamenak aztertu ondoren, neurriak pixkanaka hartuko ditu, eta urtearen amaieran matrxan jartzen hasiko direla aurreikusi du.
