Lehiaketa
BINKE / 2021eko abuztua

Laburmetrai Festibala aurten bai ospatuko da Galdakaon, irailaren 13an

TESTUA: Jon Gomez Garai

Pandemiak eragindako hutsunearen ostean, bueltan da Galdakaoko Laburmetrai Festibala. Ohiko Santakurtzen ordezko Kultur Plazaren baitan antolatuko da sari banaketa irailaren 13an. Hemen batu ditugu sariak eta lehiaketara aurkezteko bete behar diren oinarri zein irizpideak.

Pandemiak eragindako gorabeheren artean Galdakaoko Laburmetrai Festibala antolatu ez izana egon zen, besteak beste. Aurten ordea, ohiko Santakurtzen ordez Kultur Plaza antolatuko bada ere, ikus-entzunezkoen txapelketa antolatzeko erabakia hartu dute antolakuntzan «modu autonomo eta independentean» dabiltzan herriko hainbat elkarte, kolektibo eta norbanakok.

Irailaren 13an, astelehena, 21:00etan izango da —tokia, zehazteke— laburmetraiak ikusteko eta sariak banatzeko hitzordua. Hiru sari banatuko dira jaialdiaren seigarren edizio honetan:

  • Publikoaren saria, laburmetrai gustukoenari
    Urdaibaitik itsas bidaia Hegaluze itsasontziarekin, 10 pertsonentzat.
  • Epaimahaiaren saria, laburmetrai onenari
    Antzerki-inprobisazio ikastaro trinkoa, 5 pertsonentzat.
  • Antzezpen onena, epainahaiak erabakita
    Elkarlaguntza Sareak ekoiztutako produktuen otzara

Edozein lehiaketetan aurkezteko gertatu ohi den bezala, oinarri eta irizpide batzuk ezarri dituzte antolatzaileek Galdakaoko Laburmetrai Festibalerako ere. Honatx:

Oinarriak

  • Iraupena: 5 minutu gehienez.
  • MP4 formatuan.
  • Gaia eta hizkuntza libreak.
  • Lanak kortofestibala@gmail.com helbidera bidali, WeTransfer, Dropbox, Google Drive edo beste era batean.
  • Lanak bidaltzeko epemuga: irailak 11.
  • Antzerkigintzako, eta arte, letra eta informazio arloetako hiru adituk osatuko dute epaimahaia.

Irizpideak

  • Ez dira jokabide autoritario, sexista, arrazista, faxista, homofoborik zein transfoborik onartuko.
  • Lehiaketa amateurra da, ez dira laburmetrai profesionalak onartuko.
  • Gehiegizko iraupena penalizatu egingo da.
  • Epaimahiaren irizpide nagusia originaltasuna izango da, hala nola argumentua, antzezpena, eta maila teknikoa.
  • Lan batek ezingo du sari bat baino gehiago irabazi.