Enplegua
BINKE / 2022ko maiatza

Lana aurkitzeko laguntza eskainiko die Galdakaoko Udalak 16 urtetik gorakoei

TESTUA: Erredakzioa
ARGAZKIA: Pornchai Soda Copyleft

Lana aurkitu gura duten 16 urtetik gorako herritar guztiei doako zerbitzua eskaintzen hasi da Galdakaoko Udala, «interesdunaren ikasketa maila dana dalakoa izanda be». Hemen jaso dugu zerbitzuak modu pertsonalizatuan erabiltzaileari eskaintzen diona.

Laneratzen laguntzeko zerbitzua eskainiko die Galdakaoko Udalak 16 urtetik gora duten herrikideei. Zerbitzua martxan da dagoeneko eta erabat pertsonalizatua dela iragarri du Udalak berak prentsa ohar bidez.

«Norberaren beharretara, lehentasunetara eta erritmora egokituta, zeinak lan gaitasunak sortzen eta enplegurako ibilbidea hasten lagunduko deutsona», horrelakoa izango da, Udalaren esanetara, erakunde honek abian jarri duen zerbitzu berria.

Horretarako, «erabakiak hartzeko erabiltzaileak daukan gaitasuna landuko da, baita norberaren ahalmen pertsonal guztiak praktikan jartzen» ere saiatuko da udal-teknikari bat interesa duen pertsonarekin. Gainera, curriculum eraginkorra egiten irakatsi eta lana bilatzeko bideak zein doako prestakuntza saioen berri emango zaio erabiltzaileari.

Bide horretan Udaleko orientatzaile batek lagunduko du lana aurkitu gura duen herritarra, «ikasketa maila dana dalakoa izanda be», argitu du Udalak.

Interesa duenak Galdakaoko Udaleko Gizarte Ekintza arloarekin harremanetan jarri beharko du eta ondoren orientatzailea jarriko da harremanetan erabiltzailearekin, hitzordu bat emateko. Arreta egunak astelehenetan eta eguenetan izaten dira, 09:30etik 13:30era.

Harremanetan jartzeko:
Idatzi: tec.insercion@galdakao.net
Bertaratu: Gizarte Ekintza, Pontzi Zabala 3