Markesina jarriko dute Maximo Moreno parkearen pareko autobus geltokian
TESTUA ETA ARGAZKIA: Jon Gomez Garai
Bizkaiko Foru Aldundiaren eta Galdakaoko Udalaren elkarlanaren ondorio hasi dira N-634 errepideko autobus geltokiaren markesina jartzen, Maximo Moreno parke galdakoztarraren parean. Nondik dator erakunde bien arteko elkarlana eta noizko egongo da prest markesina?
Arratiarako autobusen ibilbidea aldatu eta linea askok herri barrutik igarotzeari utzi ziotenean indarra hartu zuen N-634 errepideko autobus geltokiak, Maximo Moreno parkearen parean dagoenak, Gernika kale galdakoztarrean. Aldiz, autobus geraleku honek ez du inoiz markesinarik izan, eta erabiltzaileak euri eta haizetik babestuko dituen markesina bat eskatzen hasi ziren.
Bizkaiko Foru Aldundiarena da Bizkaibusen eta hauen markesinen eskumena, baina «eskaera lehenbailehen gauzatu zedin, Aldundiarekin akordioa egin zuen Galdakaoko Udalak» dio herriko erakundeak. Akordio hori horrela azaldu zuen Udalak: «Markesinaren kostua Aldundiak ordainduko du, baina horretarako lanak egiteko ardura Galdakaoko Udalak hartu du beregain, arinago egin dadin». Elkarlan horri esker hasi dira markesina ipintzeko lanetan iragan asteburuaren atarian.
Markesinaren egitura kokatu ahal izateko, «eremua prestatu eta egokitu behar da, eta lan horretan ari dira udal langileak», azaldu zuen Galdakaoko Udalak. Bai egokitze lanak eta bai markesina bera ipintzekoak hiru astetan amaituta egongo direla aurreikusten du erakunde berak.
