‘Moko’ antzezlana eskainiko du Teatro Gorakadak Torrezabalen

TESTUA: Irati Alonso García
ARGAZKIA: Teatro Gorakada

Teatro Gorakadak ‘Moko’ umeari buruzko antzezlana aurkeztuko du zapatuan, martxoak 1, Torrezabal Kultur Etxean. «Enpatiaz, errespetuaz eta tolerantziaz hausnartzeko» obra da.

Moko beste edozein ume bezalakoa zen, baina bere abenturetako batean altuera handi batetik erori eta aurpegia desitxuratu zuen, munduaren begietarako monstruo bihurtuz.

Bakarrik sentitu arren, dohain magiko bat zuela ohartu zen: hitzak hegan ikusi, hartu eta bertso bihurtzen zituen. Haur hori heldu egin eta herriak hainbeste maite zuen poeta bilakatu zen: Bilintx.

Ume honen istorioa da hain zuzen Teatro Gorakadak irudikatuko duena Galdakaon, ‘Moko. Indalencio Bizkarrondo Bilintx’ antzezlanean.

Konpaniak obra eskainiko du Torrezabal Kultur Etxean zapatuan, martxoak 1, 18:00etan. Saiorako sarrerak eskuragai daude ohiko webgunean.