Orain arte 110 taldek eman dute Euskaraldian izena Galdakaon
TESTUA: Irati Alonso García
ARGAZKIA: Peio Zamalloa
Euskararen erabilera bultzatzeko helburua duen Euskaraldia ekimena maiatzaren 15etik 25era antolatuko da aurten. Martxoaren 15ean zabaldu zen izen-ematea eta honezkero 110 taldek eman dute izena Galdakaon.
Maiatzaren 15etik 25era antolatuko da aurten Euskaraldia, ‘Elkar mugituz egingo dugu’ lemapean. Izena emateko epea martxoaren 15ean zabaldu zen eta Galdakaon 700 herritar baino gehiagok eman zuen izena apirilaren hasierarako.
Talde moduan ere parte hartu daiteke Euskaraldian eta Galdakaon honezkero 110 taldek eman dute izena, antolakuntzak BINKEri adierazi dionez. Galdakao Atletismo Taldea, Taupadak Dantza Eskola, Galdakao Futbol Taldea, Erlantza Berdintasun Taldea, Leidu Galdakaoko Irakurketa Taldea, Elkarlaguntza Sarea eta Erabide Emakume Elkartea dira Euskaraldian Galdakaon izena eman duten taldeetako batzuk.
Izena emateko epea zabalik dago maiatzaren 15era bitarte eta webgune bitartez egin daiteke, eta baita herrietan jartzen ari diren buzoietan ere. Galdakaon bederatzi gunetan jarri dituzte buzoiak, honako eraikinetan:
- Musika eskolan
- Anbulatorioan
- Udaletxean
- Urretako kiroldegian
- Elexaldeko kiroldegian
- Santa Barbaran
- Barandiaran AEK Euskaltegian
- Udal Euskaltegian
- Torrezabal Kultur Etxean
