Osasungintza
BINKE / 2022ko ekaina

Osakidetza zigortu dute, otsaileko grebarako eskubidea ESI Barrualde-Galdakaoko langileei urratzeagatik

TESTUA: Erredakzioa
ARGAZKIA: Eldiario.es

Epaileak baliogabetzat jo ditu aste honetan Barrualde-Galdakao ESIak Lehen Mailako Arretan otsailaren 25eko eta 28ko grebetarako ezarritako gutxieneko zerbitzuak.

Bilboko Administrazioarekiko lehenengo zenbakiko epaitegiak Osakidetza zigortu du, «Satse sindikatuaren, bere afiliatu erizain eta fisioterapeuten eta profesional guztien grebarako eskubidea 2022ko otsailaren 25ean eta 28an urratzeagatik», El Diario egunkariaren arabera. Horrela, epaileak baliogabetzat jo ditu Barrualde-Galdakao ESIk greba bietarako Lehen Mailako Arretan ezarritako gutxieneko zerbitzuak. Bi jardunaldietan, ESIek gutxieneko zerbitzuen aginduen edukia urratu zuten, Eusko Jaurlaritzak ezarritakoak gaindituz, Satsek ohar batean jakinarazi duenez.

Ebazpenak ziurtatzen du, zehazki, «Osakidetzak ez zuela errespetatu gutxieneko zerbitzuak osasun-zentro berberetan eta larunbat bateko langileekin soilik ezartzeko irizpidea». ESK sindikatuak dio baliogabetzat jotzen dela, halaber, otsailaren 28ko grebarako gutxieneko zerbitzuen zehaztapena eguneko ospitale medikoan, endoskopietan, erradiologian (RX), etxeko ospitalizazioan eta Urdulizko ospitaleko eguneko ospitale medikoan —Osakidetzako Uribe ESIri atxikia dagoena azken hau—, «Osakidetzak larunbatetan ematen ez dituen zerbitzuak gutxieneko zerbitzuek eragindako unitate gisa sartu zituelako».

Aipatutako sindikatuak gogoratu duenez, Osakidetzak argudiatu zuen «ezin zituela herritarrak zenbait zerbitzu gabe utzi haien osasuna bermatzeko». Hala ere, epaiaren arabera, horrek ondorioztatuko luke «Osakidetzak asteburuetan egituratu duela osasun-laguntzaren diseinua», zapatuetan zehazki, «herritarrek osasunerako duten eskubidearen aurkakoa». Hala kontatu zuen El Diario egunkariak ekainaren 23an.