Osakidetzako biltegietako langileek elkarretaratzea egingo dute Usansoloko ospitalean
TESTUA: Irati Alonso García
ARGAZKIA: ELA Osakidetza
Osakidetzaren zentro medikoetan behar diren produktuak gordetzeko biltegi txikiak itxi eta Iurretako EITBren egoitza zaharrean hauek batzeko zentro logistiko bat irekiko du Osasun Sailak 2026an. Honen kontra agertu dira biltegietako langileak eta gaur elkarretaratzea egingo dute Gurutzetako, Basurtuko eta Usansoloko ospitaleetan.
Pasa den apirilaren 3an Eusko Jaularitzak 2026an Osakidetzaren zentro medikoetan behar diren produktuak gordetzeko biltegi txikiak itxi eta Iurretako EITBren egoitza zaharrean hauek batzeko zentro logistiko bat irekiko duela iragarri zuen.
«Zentralizazio horren atzean ezkutuko pribatizazioa besterik ez da ezkutatzen. Hainbat iturriren bidez jakin ahal izan dugu Osakidetzaren benetako helburua dela gaur egun zerbitzu-erakundeetan dituen biltegiak ixtea, baliabide eta langile propioekin kudeatuta, etorkizuneko plataforma logistikoan zentralizatzeko. Plataforma horren kudeaketa kanpoko enpresa bati azpikontratatuko zaio eta, beraz, pribatizatu egingo da», adierazi dute langileek.
Hau salatzeko, mobilizazioak egiten ari dira eta gaur bertan elkarretaratzea egingo dute Gurutzetako, Basurtuko eta Usansoloko ospitaleetan. Usansolon 11:00etan izango da, ELA, LAB, CCOO, UGT eta ESK sindikatuek deituta.
«Sindikatuek Oaskidetzari eskatu diote proiektua berehala geldiarazteko; sindikatuei horri buruzko informazio guztia eskaintzeko; eta zerbitzu guztien titulartasuna eta kudeaketa % 100 publikoa izatea bermatzeko», aldarrikatu dute langileek.
