Hizkuntza eskubideak
BINKE / 2022ko otsaila

Pantailak Euskaraz ekimenak jaso du «Kanpaina onenaren» Argia Saria

TESTUA: Jon Gomez Garai
ARGAZKIA: Dani Blanco / Argia

Bere kideen artean hainbat usansolotar eta galdakoztar dituen eta Binkek babestu duen Pantailak Euskaraz ekimenak Argia Saria jaso du gaur, Kanpaina Onenaren atalean. Sari hori, taldearen ordezkari, Izaskun Rekalde usansolotarrak jaso du Alex Aginagalderekin batera.

Euskarazko kazetaritza eta komunikazioa saritzen ditu urtero Argia aldizkariak bost ataletan bereizita —prentsa saria, kanpaina, irratia, ikus-entzunezkoak eta internet—, eta sariok egunotan banatzen ari da Euskal Herriko hedabidea. Gaur Kanpaina Onenaren saria eman du jakitera: galdakoztarrak eta usansolotarrak kide ere badituen Pantailak Euskaraz ekimena.

Prentsa atalean Aiaraldea komunikabidea, ikus-entzunezkoetan DAPA ikus-entzunezko narrazioak, interneteko atalean Badok.eus ataria eta irratian Artixipielagoa podcasta izan dira aurtengo saritu. Ordea, otsailaren 4arekin Kanpaina Oneraren Argia Saria Pantailak Euskaraz ekimen herritarrari eskaini diote.

Euskarazko ikus-entzunezkoen aldeko ekimena da Pantailak Euskaraz. Streaming plataformetan euskarak duen presentzia urriari aurre egiteko martxan jarri zen eta saria jaso du, Argiaren hitzetan, «denbora gutxian herritarren nahiari ahotsa eman eta ardura dutenak mugiaraztea lortu dutelako».

Guztira 30.000 sinadura baino gehiago batu dituzte Pantailak Euskaraz ekimenak bere baitan hartzen dituen «Disney+ euskaraz», «Netflix euskaraz», «Zinemak euskaraz» eta «3.000 twitz» aldarrikapenek, euren ardura Eusko Legebiltzarrera ere eramatea lortu zuten, ikus-entzunezko hedabideen euskal kontseilua sortzea proposatu dute eta Euskal Herriko hamaika erakunde ezagunek ekimen honi babesa ematea lortu dute.

Ekimen honek Binkeren babesa ere jaso du eta bere kideen artean hainbat usansolotar eta galdakoztar ere badago; saria bera, esaterako, Alex Aginagalde donostiarrarekin batera Izaskun Rekalde usansolotarrak jaso du.

Zorionak talde osoari!