Sagardotegira irteera antolatu du Zizpak martxoaren 26rako
Gazte konpartsa
BINKE / 2022ko otsaila
Sagardotegira irteera antolatu du Zizpak martxoaren 26rako
TESTUA: Naia Bergaretxe Sarria
ARGAZKIA: Oiarbide sagardotegia
Bere 25. urteurrena ospatzeko, otsailean inauterietarako gaia proposatu du Zizpa gazte konpartsak, eta martxorako sagardotegiko irteera. Tiketak arin ari dira saltzen, eta albiste honetan batu ditugu egun horri lotuta jakin beharreko asko.
Hogeitabost urte betetzen ari da aurten Zizpa gazte konpartsa galdakoztarra. Horretarako, Binkek urtarrilaren 15ean bideo bidez argitaratu zuen prentsaurrekoan Zizpako kideek adierazi zuten bezala, hilero ekintzaren bat egiteko asmoa dute.
Otsaileko ekintza inauteriak izango dituzte zizpakideek, hilaren 25 eta 26an, eta mozorrotzeko gaia ere proposatu dute: zinema. Horren bueltan mozorrotuko dira Zizpa 25 urte betetzen ari dela ospatu gura dutenek.
Martxoko ekintza berriz 26rako iragarri dute: sagardotegiko irteera. Pandemiak gogor markatu badu ere, bueltan da sagardotegi garaia ere, eta Astigarragako Oiarbide sagardotegian egin dute erreserba. Ehun tiket jarri dituzte Zurrutz tabernan eta Herriko Bentan salgai, eta dagoeneko erdia salduta dutela iragarri dute Zizparen Instagram kontutik.
Martxoaren 26an 11:00etan Ardanza parkeko bus geltokitik irtengo dira, poteoa Astigarragan egingo dute eta bazkalostean parrandak Hernanin jarraituko du. Plan honek «gazteak saretzea» du helburu, Zizpak Binkeri aitortu dionez, «harremanak sortzeko eta kuadrilak nahasteko».
Plan honetan izena eman gura duenak beraz, aipatutako lekuetan erosi beharko du tiketa 50€ren truke —prezio honek barne hartuko du autobusaren alokairua eta sagardotegiko menua—.
Bueltako ordua zehazteke dute Zizpako kideek, baina une horretako murrizketek utziz gero, Hernanitik Galdakaora buelta goizaldeko 04:00etan egiteko asmoa dute antolatzaileek.
