Sormene
BINKE / 2020ko abendua

Trap doinuak ekarri ditu J. Martina taldeak Sormenera

TESTUA: Beñat Armentia Arriandiaga
BIDEOA: Binke

Egungo musika egiten duten emakume gazteen solasaldian aritu direnak dira jarraian oholtzara berriz igo direnak, baina euren lanak jendarteari erakusteko. Lehena, Larrabetzuko Barcena ahizpek sortutako J Martina trap taldea izan da.

Emakume sortzaile euskaldunek egungo kantagintzan duten lekuaren inguruko solasaldia behin bukatuta, mahi-inguruan parte hartu duten hauen emanaldien txanda izan da ondoren. J. Martina taldea izan da kantatzen lehena, eta soinu elektronikoz beteriko kanta berritzaileak eskaini dituzte.

Kattalin Barcenak, Ane Barcenak eta Javi Jorajuriak osatzen dute J. Martina taldea. Larrabetzuko bi ahizpek izan zuten taldea sortzearen egitasmoa eta lehen urratsa, eta hau gorpuzteko eta ekiteko asmoz, Kattalinen gelakidea zen Javiri haiekin batera taldea osatzea proposatu zioten duela urte eta erdi pasatxo. Ordurako bazekiten Javik bere etxean sintetizadore batzuk izateaz gain, abesti bat ekoizteko eta grabatzeko ezagutzak bazituela, eta ideia zehatzik gabe elkartu, eta aise ekin zioten abestiak sortzeari. Taldea sortu baino lehen, soinu elektronikoek garrantzia berezia zuten bi ahizpen bizitzetan, eta bai batak zein besteak argi zuten doinu elektronikoz beteriko talde bat sortu nahi zutela, eta hala egin ere.

Argi dute hirurek gustukoak dituzten musika estilo hauen testuinguruak eta jatorriak zeintzuk diren, haien esanetan, «espazio proletarizatu batean sortutako generoak dira, despolitizazio eta emakumeen hipersexualizazioz beterikoak», baina aldi berean zera diote: «Estilo hauek garatzen eta zabaltzen joan garen heinean musika mota hau egiteko beste modu batzuk sortu dira, eta onuragarria dela uste dugu». Haien kasuan, adibidez, inguratzen dieten kontestutik sortu direla diote, ez kopia soil batetik. Horregatik, abesti bat sortzerako orduan letrari berebiziko garrantzia eman eta hemendik hasten dira, eta ondoren melodia bat finkatzen diote honi, abestia bera letraren menpe utziz. Finean, gogo bati, ardura bati, salaketa bati edota inguratzen dieten errealitate horri nahi diote kantatu.

Eskainitako emanaldiari dagokionez, soinu elektronikoek hornitu dituzte kantak, eta Javi izan da honen arduradun, kitarraren eta sintetizadoreen bitartez. Bi ahizpek aldiz melodia jarri diote kantei, ahotsarekin eta kasu gehienetan «autotunearen» laguntzaz. Erritmo geldoak batzuetan, arinagoak eta dantzagarriagoak beste batzuetan, ez da ba erraza sortzen duten horri etiketa soil bat jartzea, baina haiek dioten bezala ez lukete trap generora soilik mugatuko haien musika.

Guztira zortzi kanta abestu dituzte, tartean Dellafuente abeslariaren bertsio bat eginez ere bai. Abestiei dagokienez, batzuetan doinu ilunagoak erabili dituzte, argiagoak beste batzuetan, eta hauetan zehar bi ahizpak askotan txandaka aritu arren, sarri egin dituzte homofoniak elkarren artean.

Ostiralarekin jarraitzeko, Haizea eta Ningra gasteiztarrek hartu diete lekukoa J. Martinari. Hip-hopa eta honen barruan dagoen rapa da gehien bat bikoteak sortzen duen musika estiloa, eta bai bata zein bestea duela gutxi hasi badira ere, oihartzun handia izan dute dagoeneko egin dituzten kantek.

Gogoratu saio honetatik hasita, datozen ekitaldiak streaming bidez baino ezin direla jarraitu. Horretarako, Binkeren webgunearen hasiera-orrira joatea baino ez duzue, saio guztiak bertatik bertara jarraitzeko.