Udako landareak kendu eta bihar banatuko ditu Galdakaoko Udalak herritarren artean
TESTUA: Jon Gomez Garai
ARGAZKIA: Irati Alonso García
Udalerrian dauden udako landareak kendu eta negukoak jartzen ari dira Galdakaoko lorazainak. Beste behin, kendutako horiek interesa duten herritarren artean banatuko dituzte bihar, ondoko albistean adierazitako toki eta ordutegian.
Ohikoa bilakatu den moduan, langileek kendutako landareak herritarren artean banatuko ditu Galdakaoko Udalak oraingoan ere, «hauei bigarren bizitza bat emateko asmoz». Udakoak kentzeko sasoia iritsi da, eta neguko landareak jartzen hasi dira honezkero herriko lorazainak. Negukoak izango dira, hortaz, «datozen hilabeteetan Galdakaoko kaleak apainduko dituztenak», Udalak adierazi bezala.
Udako landareen banaketa eguen honetan izango da, azaroak 7, udaletxe albora 09:30etik aurrera gerturatzen diren bizilagunen artean—gehienez 11:00 arte, «edo loreak amaitu arte», iragarri du erakundeak—.
Momentuz txanda bakar horretan banatuko dira kendutako landareak, baina hala helarazi du ohar bidez Galdakaoko Udalak: «Ordezkapen lanak luzatzekotan eta hornidura gehiago egotekotan, beste banaketa bat egingo litzateke datorren astean. Data berri hori udaleko sare sozialen bidez jakinaraziko litzateke».
