Urreta kiroldegiak ur-puzgarriak jarriko ditu zapatuan
TESTUA: Irati Alonso García
ARGAZKIA: BStock
Haurrei zuzendutako hainbat ekintza antolatu ditu Gabonetan Galdakaoko Udalak, haien artean, ur-puzgarriak jarriko ditu Urreta kiroldegian zapatuan, hilak 7. Jarduera lau eta hamasei urte arteko umeei dago zuzenduta eta parte hartzeko aurretik izena eman behar da.
Galdakaoko umeek uretan gozatzeko aukera izango dute zapatuan, urtarrilak 7, Urreta kiroldegian. Udalak ur-puzgarriak jarriko ditu arratsaldean, lau eta hamasei urte arteko haur eta gazteei zuzendutako ekintzan.
Arduradunek jakinarazi dutenez, bi txandatan banatuko dira. 16:30-18:00 izango da lehenengoa eta 18:00-19:30 bigarrena. Hala ere, igerilekuak itxita egongo dira gainontzeko auzokideentzat 15:15etik 21:15era.
Saioan parte hartzeko beharrezkoa da aurretik Urreta Kiroldegiko harrera kontrolean izena ematea, epea zabalik egongo dela plazak amaitu arte.
Zortzi urte beherako umeak nagusi batek lagunduta joan beharko dira eta mangitoak erabili ahal izango dituzte. Bost adin txikiko sartu ahal izango dira igerilekuan pertsona nagusi bakoitzarekin.
