Usansolok errekurtsoa jarriko dio Eusko Jaurlaritzari, Metroa herrigunera ez iristea salatzeko
TESTUA ETA ARGAZKIA: Jon Gomez Garai
Etorkizunean Usansoloko ospitalearen Metro sarbideetako bat herrigunera 87 metro gerturatuko badute ere, Udala eta Geltokia Erdigunean plataforma ez daude ados Eusko Jaurlaritzaren Garraio Sailak hartutako erabakiarekin. Ondorioz, erabaki horri helegitea jarriko diotela iragarri dute bi erakundeek.
Metroaren 5. linearen proiektuak beste aldaketa bat egingo du Usansoloko ospitalean kokatuko den geltokiaren sarbideetan, BINKEk azaldu zuen bezala: Eusko Jaurlaritzak geralekuaren ahoetako bat 87 metrotan luzatuko duen diseinua onartu du, erdigunera pixka bat gehiago hurbiltzeko helburuarekin.
Hala ere, udalerriaren erdigunera ez da iritsiko, eta, beraz, anezka edo lanzadera zerbitzua izango du ospitaleko irteera berritik Usansoloren erdigunera. Baina Udala eta Geltokia Erdigunean plataforma aldaketa berri horien aurka agertu dira; aurrekontu osoa 9,3 milioi euro handitzea ekarriko duena, gainera.
Metroa Galdakaora zabaltzeko lanak polemika handia sortu du hasieratik, Usansolok —gaur egun Euskotrenen geltoki bat herrigunean duenak—, herrian metro-geltoki propiorik izango ez zuela iragarri zenetik. Geroztik protestan ari dira etengabe ehunka usansolotar, eta aldarrikapen horretarako plataforma propioa sortu ere, aurretik BINKEk sarri horren berri eman izan duen bezala.
Plataforma honentzat, aldiz, ez omen da gauza berria, eta hala azaldu zuen Jon Atxutegi mugimenduko bozeramaileak: «Guk maiatzean jaso genuen proposamen hori, eta erabat baztertu genuen, ez dugulako ibaiaz bestaldeko aho bat nahi anezka-zerbitzu batekin». «Plataforma gisa, mobilizazioekin jarraitzeaz gain, erabaki horren aurkako errekurtsoa jarriko dugu Eusko Jaurlaritzako Garraio Sailean, eta udalerriko eragileekin eta Udalarekin koordinatuko gara, auzibidera jotzeko, hala uste badugu», salatu zuen irmoki Atxutegik. Antzeko ildoan mintzatu zen Agustin Aizpuru jarduneko alkatea ere: «Horrek ez ditu asetzen usansolotarren itxaropenak eta Usansoloko herriak nahi duena, desplazamendu-denborak gora egiten jarraitzen duelako». Ondorioz, errekurtsoa jarriko diote Garraio Sailak hartutako erabaki horri.
Jaurlaritzaren Sail beretik ordea azpimarratu dute erabakia irmoa dela, «teknikoki onena», baina usansolotarrekin hitz egiten jarraituko dutela, «etorkizuneko 5. lineako geltokirako sarbidea hobetzeko aukera posibleei heltzeko».
