Usansolon lanaldi osoko pediatra bat eskatzeko sinadura bilketa hasi dute
TESTUA: Irati Alonso García
ARGAZKIA: Google Maps
Usansolon pediatra bakarra dagoela eta «ez lanaldi osoan eta ez egunero» salatu du Usansolo Haurtzaroa plataformak. Honen aurrean, taldeak sinadura bilketa hasi du, Usansolon lanaldi osoan zerbitzua eskainiko duen pediatra bat eskatzeko.
Usansolon pediatra bakarra dagoela eta, «ez lanaldi osoan eta ez egunero» salatu du Usansolo Haurtzaroa plataformak. Osasun-zentro bakoitzari 0-14 urte bitarteko 800 biztanleko pediatra bat dagokiola adierazi ondoren, «konpondu beharreko arazoa» dela ohartarazi du taldeak.
Hain zuzen, Usansolon zerbitzua eskainiko duen lanaldi osoko pediatra bat eskatzeko sinadura bilketa hasi du plataformak change.org webgunean.
«Usansoloko anbulatorioan pediatrarik ez dagoen egunean Galdakaoko anbulatoriora joan behar gara eta 4 kilometrora dago», azpimarratu dute Usansolo Haurtzaroa plataformatik. «Edozein arrazoirengatik ezin bazaituzte hor artatu, Basaurira jo beharko genuke, eta bertan ez da pediatra bat izango gure seme-alabak artatuko dituena», salatu dute.
«Ez dugu gure adingabeek merezi duten arreta. Ez da normala osasun-zentroan arreta jaso arte astebete itxaron behar izatea. 0 eta 14 urte bitarteko gure biztanleria handitu egin da eta Osakidetzaren berehalako konponbidea eskatzen dugu», aldarrikatu dute.
