Zabalik dago Zazpi Trokak mendi-lasterketan izena emateko epea
TESTUA: Irati Alonso García
ARGAZKIA: Aldrun
Ganguren Mendi Taldeak Zazpi Trokak mendi-lasterketaren hirugarren edizioa antolatuko du apirilaren 20an. Ibilbideak 22,5 kilometroko luzera izango du eta izena emateko epea zabalik dago.
Aurten ere Ganguren Mendi Taldeak Zazpi Trokak mendi-lasterketa antolatuko du. Hirugarren edizioa apirilaren 20an izango da eta guztira 22,5 kilometroko ibilbidea egingo dute egun horretan parte-hartzaileek, 1.200 metroko desnibelarekin.
Bizkaiko Mendi Lasterketa Txapelketaren barruan antolatu da lasterketa hau, maila absolutuan, gizon eta emakumezkoentzat. Lasterketa laburra ere antolatuko dute egun berean, 16 kilometrokoa.
Lasterketan izena emateko epea zabalik dago webgune bitartez eta dataren araberakoa izango da prezioa, baita federatuta edo ez egotearen araberakoa ere.
