Torrezabaleko eta Aperribaiko udal liburutegiek eguneroko zerbitzua eskaintzen diete herritarrei, eta iaz 29.620 mailegu egin zituzten guztira. Bi liburutegiek 9.678 bazkide dituzte, Galdakaoko biztanleriaren %40 inguru.
Zapatuan, urriak 24, Liburutegien Nazioarteko Eguna ospatu zen, eta horren harira Galdakaoko Udalak herrian eskaintzen den zerbitzuaren inguruko datuak ezagutzera eman ditu.
Torrezabaleko eta Aperribaiko udal liburutegiek eguneroko zerbitzua eskaintzen diete herritarrei, liburuak maileguan hartzeko aukeraz gain, irakurketa sustatzeko eta kultur jardueretan parte hartzeko espazioak ere eskainiz.
Iaz, bi liburutegiek 29.620 mailegu egin zituzten: 28.334 Torrezabalekoan eta 1.286 Aperribaikoan. Mailegu gehienak helduentzako liburuei dagozkie, 22.666.
Bestalde, haurrei zuzendutako liburuen 6.530 mailegu ere egin ziren, eta ikastetxeek ere erabiltzen dituzte liburutegietako baliabideak. Guztira, bi liburutegiek 9.678 bazkide dituzte, Galdakaoko biztanleriaren %40 inguru.
Helduen artean, intriga, suspensea eta nobela historikoak dira gehien mailegatzen diren generoak. Euskarazko literaturan, Miñan (Amets Arzallus eta Ibrahima Balde), Aitaren etxea eta Amaren eskuak (Karmele Jaio) bezalako lanek harrera ona dute, baita Uxue Alberdi, Katixa Agirre, Eider Rodriguez eta Alberto Ladron Arana idazleen liburuek ere.
Gaztelaniazko eleberrien artean, aldiz, Euskal Herrian girotutako thrillerrek irakurle ugari erakartzen dituzte, Ibon Martin, Mikel Santiago eta Haizea Lopezen lanek, esaterako.
Haurren eta gazteen artean, berriz, ipuinak eta irakurtzen ikasteko liburuak dira eskatuenetakoak. Azken urteetan, letra larriz argitaratutako lanak (Munstroen eskola) eta, adinaren arabera, Katta (Miren Agur Meabe), Onin (Ibon Martin), Futboleroak (Roberto Santiago) eta Ezekiel (Jasone Osoro) liburuak ere nabarmentzen dira. Horrez gain, ikastetxeetan eskatzen zaizkien irakurgaiak ere mailegatzen dituzte haur eta gazte askok.
Bestalde, aipatzekoa da paperezko liburuak nagusi diren arren, liburu digitalek eta audioliburuek gero eta presentzia handiagoa dutela, eLiburutegia bezalako zerbitzuen bidez.
Maileguetatik haratago
Galdakaoko udal liburutegiek, guztira, 85.369 liburu dituzte: 62.519 Torrezabalen eta 22.850 Aperribain. Baina liburutegien lana ez da maileguetara mugatzen. Hemeroteka eta kontsulta zerbitzuez gain, irakurketa klubak, ikastetxeentzako bisitak eta erakusketak ere antolatzen dituzte.
Halaber, haurrentzako ipuin kontaketa saioak eskaini ditu Galdakaok urria eta azaroan, BINKEk jaso zuen moduan.
