Galdakaoko Lanbide Heziketako ikastetxeetako ikasleak, sarituak aurtengo Euskoskills lehiaketan

TESTUA ETA ARGAZKIAK: Andra Mari LH eta Ostalaritza LH

Hezkuntza Saileko Lanbide Heziketako Sailburuordetzak bi urterik behin antolatzen du Euskoskills lehiaketa, Lanbide Heziketako zikloetan matrikulatutako ikasleentzat. Aurtengo edizioa Irungo Ficoba erakustazokan egin da.

Ikasleek ikasten ari diren zikloarekin lotutako lehiaketetan hartzen dute parte, eta frogatu behar dute ikasten ari diren heziketa-zikloaren berezko trebetasunak eta gaitasunak menperatzen dituztela. Horretarako, zenbait proba bete behar dute bi egunetan. Horretaz gain, ikasleek proba amaitzeko baliatu behar dituzten zeharkako beste gaitasun batzuk ere baloratzen dira.

Aurtengo Euskoskills edizioan, Galdakaoko Andra Mari LH eta Ostalaritza LH-ko ikasleek hartu dute parte, eta saridun atera dira. Andra Mari LH-koek zilarrezko domina lortu dute 4.0 Industria arloan eta brontzezko bi domina, bat Zibersegurtasuna arloan eta beste bat Mekatronika arloan. Bestalde, Ostalaritza LH-ko ikasleek urrezko eta brontzezko dominak lortu dituzte Jatetxe eta Taberna Zerbitzuen arloan, eta urrezko, zilarrezko eta brontzezko dominak Okintza arloan. Aurtengo Euskoskills edizio arrakastatsua, beraz, Galdakaoko LH ikastetxeetako ikasleentzat.