Usansoloko erdigunean Metro geltokia eskatzeko manifestazioa egingo da bihar
TESTUA: Irati Alonso García
ARGAZKIA: Google Maps
Metroaren 5. linearen proiektuan gaur egun Usansoloko erdigunean kokatzen den geltokia kentzea aurreikusi dute eta erabaki honen kontra agertu dira auzokideak. Erdigunean geltokia ezartzea eskatzeko manifestazioa egingo dute bihar Unkina plazatik.
Bizkaiko Foru Aldundiak eta Eusko Jaurlaritzak Metroaren 5. linearen ibilbidea ezagutzera eman zuten urrian eta Usansoloko auzokideek linea berri honek gaur egungo Euskotren geltokia kendu eta ospitale ondoko Labea auzora aldatuko duela salatu zuten.
Usansoloko erdigunean Metro geltokia ezartzeko eskatzen izan dira ordutik eta horretan jarraituko dute. Hainbat elkarte eta alderdik deituta, bihar manifestazioa egingo dute Usansolon, «gure herrian geltoki zentriko bat babesteko eta aldarrikatzeko».
Antolatzaileek jakinarazi dutenez, Unkina plazan hasiko da goizeko 12:00etan. «Animatu eta etorri! Denon artean indar gehiagorekin joko dugu!», adierazi dute sareetatik.
