Usansoloko etxebizitza batean lapurtzeagatik lau gazte atxilotu ditu Galdakaoko Udaltzaingoak
TESTUA: Jon Gomez Garai
ARGAZKIA: Dapa images
Usansoloko etxebizitza batean ustez lapurretan egin zuten lau gazte harrapatu zituen atzo goizean Galdakaoko Udaltzaingoak, autoan ihesi zioazela. Gertatutakoa kontatu dio Udaltzaingoak Binkeri.
Martitzen goizean, hilak 20 zituela, Usansoloko auzokide batek Galdakaoko Udaltzaingora deitu zuen bere ondoko bizilagunen etxebizitzan lapurtzen ari zirelakoan. Udaltzainak lapurretaren eraikinera gerturatu ziren eta lapurrak ihesean atzeman zituzten.
«Errepide nagusira irten baino lehen harrapatu genduzan lapurrak, autoan ihesean», kontatu dio Galdakaoko Udaltzaingoak Binkeri. Unean bertan atxilotu zituzten. Lau gazte ziren atxilotutako ebasleak, eta Udaltzaingoak eginbideak ireki dizkie laurei, ustezko delitua Ertzaintzaren esku utzi eta honek gertatutakoa ikertu dezan.
